કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે દ્વારા વડાપ્રધાન નરેન્દ્ર મોદીના સ્વર્ગસ્થ પિતા પર કરવામાં આવેલી ટિપ્પણીનો મામલો હવે દેશભરમાં ગાજી રહ્યો છે, અને ગુજરાતમાં તેના ઘેરા પ્રત્યાઘાતો જોવા મળ્યા છે. આ અપમાનજનક નિવેદન સામે રોષે ભરાયેલા ગુજરાત પ્રદેશ ભાજપે પાટનગર ગાંધીનગરમાં રસ્તા પર ઉતરીને ભારે વિરોધ પ્રદર્શન કર્યું હતું. ભાજપ સંગઠન દ્વારા ઘ-5 સર્કલથી શરૂ કરીને પ્રદેશ કોંગ્રેસ સમિતિના કાર્યાલય સુધી આશરે 500 મીટર લાંબી એક વિશાળ વિરોધ રેલી કાઢવામાં આવી હતી, જેમાં કોંગ્રેસના મોવડીમંડળ વિરુદ્ધ ઉગ્ર સૂત્રોચ્ચાર કરવામાં આવ્યા હતા.
આ આક્રમક રેલીનું નેતૃત્વ ભાજપના પ્રદેશ પ્રમુખ જગદીશ વિશ્વકર્મા અને પ્રદેશ પ્રભારી તરુણ ચૂઘ દ્વારા કરવામાં આવ્યું હતું. તેમની સાથે અમદાવાદ અને ગાંધીનગર જિલ્લા તેમજ મહાનગરના ધારાસભ્યો, ચૂંટાયેલા જનપ્રતિનિધિઓ અને સેંકડો કાર્યકરો હાથમાં પ્લેકાર્ડ્સ અને કાળા વાવટા લઈને જોડાયા હતા. જ્યારે આ રેલી કોંગ્રેસ કાર્યાલય બહાર પહોંચી ત્યારે અંદરથી કોંગ્રેસના કાર્યકરો પણ બહાર આવીને સૂત્રોચ્ચાર કરવા લાગ્યા હતા, જેના કારણે બંને પક્ષના સમર્થકો આમને-સામને આવી ગયા હતા અને માહોલ એકદમ તણાવપૂર્ણ બની ગયો હતો. જોકે, કોઈ મોટી અપ્રિય ઘટના ન ઘટે તે માટે પોલીસ કાફલો તાત્કાલિક દોડી આવ્યો હતો અને ચુસ્ત બંદોબસ્ત ગોઠવી દીધો હતો.
આ વિરોધ પ્રદર્શન દરમિયાન ભાજપના અગ્રણીઓએ કોંગ્રેસ સામે આકરા પ્રહારો કર્યા હતા. ભાજપના એસસી મોરચાના અધ્યક્ષ ડૉ. કિરીટ સોલંકીએ આક્રોશ વ્યક્ત કરતા જણાવ્યું હતું કે આ ઉંમરે મલ્લિકાર્જુન ખડગે જે ભાષા વાપરી રહ્યા છે તેના પર દયા આવે છે. વડાપ્રધાન મોદીના સ્વર્ગસ્થ પિતા, જેમનો ક્યારેય રાજકારણ કે જાહેર જીવન સાથે કોઈ નાતો જ નહોતો, તેમના વિશે આવી વાહિયાત વાતો કરવી તે કોંગ્રેસના નીચલા સ્તરના અને સંસ્કારહીન રાજકારણને ઉજાગર કરે છે. ભાજપના નેતાઓએ સ્પષ્ટ શબ્દોમાં ચેતવણી આપી હતી કે ગુજરાતની જનતા નેતાઓના આવા ગંદકીભર્યા અને અંગત આક્ષેપોવાળા રાજકારણને ક્યારેય સ્વીકારશે નહીં.
