આજકાલ દુનિયાના કોઈ પણ ખૂણે કુદરતી આફતો કે ટેક્નિકલ ખામીઓને કારણે અચાનક મુશ્કેલીઓ ઊભી થઈ જતી હોય છે. આવું જ કંઈક યુકેમાં ધ્યાનમાં રાખીને ત્યાંની સરકારે એક મોટું પગલું ભર્યું છે. યુકે સરકારે 'બી રેડી' નામનું એક નવું અભિયાન લોન્ચ કર્યું છે, જેનો હેતુ લોકોને કોઈપણ ઈમરજન્સી સ્થિતિ માટે પહેલેથી જ સાવચેત અને સજ્જ કરવાનો છે. આગામી 3 વર્ષ સુધી ચાલનારા આ કેમ્પેઈન પાછળનો મુખ્ય ઉદ્દેશ્ય એ છે કે જો અચાનક લાઈટ વયા જાય, પીવાનું પાણી બંધ થઈ જાય કે પછી ઈન્ટરનેટ સેવા ઠપ થઈ જાય, તો પણ સામાન્ય લોકો મુશ્કેલીમાં મૂકાયા વગર પોતાના ઘરે ઓછામાં ઓછા 3 દિવસ કેવી રીતે વિતાવી શકે.
આ અભિયાન અંતર્ગત બ્રિટનના નાગરિકોને પ્રોત્સાહિત કરવામાં આવી રહ્યા છે કે તેઓ પોતાના ઘરમાં ખાવા-પીવાની જરૂરી ચીજવસ્તુઓ અને પાણીનો પૂરતો જથ્થો અગાઉથી જ સ્ટોક કરીને રાખે. આ ઉપરાંત, કોઈ મોટી કટોકટી સર્જાય ત્યારે તાત્કાલિક મદદ મેળવવા માટે 'પ્રાયોરિટી સર્વિસીઝ રજિસ્ટર'માં પોતાનું રજીસ્ટ્રેશન કરાવવાની પણ સલાહ આપવામાં આવી છે, જેથી જરૂરિયાતના સમયે વહેલી તકે સહાય પહોંચાડી શકાય. આ કોઈ નાનીસૂની વાત નથી, પરંતુ લોકોની સુરક્ષા માટેનું એક ગંભીર આયોજન છે.
લોકો સુધી આ મેસેજ સરખી રીતે પહોંચે અને જાગૃતિ ફેલાય તે માટે સરકાર એકલી કામ નથી કરી રહી. આ કેમ્પેઈનને સફળ બનાવવા માટે 500થી વધુ અલગ-અલગ ઓર્ગેનાઇઝેશન્સ એકસાથે મળીને કામ કરશે. આ તમામ સંસ્થાઓ મળીને લોકોને ઈમરજન્સી તૈયારીઓની સાચી રીતો અને ટિપ્સ શીખવશે, જેથી ગમે તેવી કપરી પરિસ્થિતિમાં પણ બ્રિટિશ નાગરિકો ગભરાઈ જવાના બદલે હિંમત અને સમજદારીપૂર્વક તેનો સામનો કરી શકે.
