આપણે સૌ જાણીએ છીએ કે ઘણી સેલેબ્સ લાઈમલાઈટથી દૂર શાંતિભરી લાઈફસ્ટાઈલ જીવવાનું પસંદ કરતી હોય છે. સાઉથ અને હિન્દી સિનેમામાં પોતાની કમાલની એક્ટિંગથી લાખો દિલ જીતનારી એક્ટ્રેસ અસિન પણ આ લિસ્ટમાં ટોપ પર આવે છે. અસિને 26 ઓક્ટોબરે તેનો 41મો બર્થડે સેલિબ્રેટ કર્યો છે, જેના કારણે ફેન્સ ફરી એકવાર તેની પર્સનલ લાઈફ વિશે જાણવા માટે ઉત્સુક બન્યા છે. વર્ષ 2016માં માઈક્રોમેક્સ કંપનીના કો-ફાઉન્ડર રાહુલ શર્મા સાથે શાહી અંદાજમાં લગ્ન કર્યા બાદ અસિને ફિલ્મી દુનિયાને અલવિદા કહી દીધી હતી અને તે હવે પોતાની ફેમિલી સાથે એકદમ પ્રાઈવેટ અને ખુશહાલ લાઈફ એન્જોય કરી રહી છે.
અસિન અને રાહુલ શર્માની લાઈફસ્ટાઈલ એટલી ભવ્ય છે કે જાણીને આંખો ફાટી જાય. દિલ્હીના પોશ વિસ્તાર ગણાતા મહેરાઉલીમાં આ કપલનું એક વિશાળ અને આલીશાન ફાર્મહાઉસ આવેલું છે. આ ફાર્મહાઉસ અંદાજે 3 એકર જમીનમાં ફેલાયેલું છે અને તેની કિંમત 80 કરોડ રૂપિયાથી પણ વધારે આંકવામાં આવે છે. આ મહેલ જેવા ફાર્મહાઉસમાં મોર્ડન લક્ઝરીથી લઈને કુદરતી હરિયાળી સુધીની તમામ સુવિધાઓ ઉપલબ્ધ છે. ફિલ્મી પડદે ચમકતી અસિન આજે હકીકતમાં કોઈ રાણીની જેમ આ ફાર્મહાઉસમાં પોતાનો સમય વિતાવી રહી છે. આ લક્ઝરિયસ ઘર સિવાય આ કપલ પાસે મોંઘીદાટ ગાડીઓનું શાનદાર કલેક્શન પણ છે.
લગ્ન પછી અસિને મોટાભાગે પોતાની પર્સનલ લાઈફને લાઈમલાઈટથી દૂર જ રાખી છે, છતાં સોશિયલ મીડિયા પર તેની લાઈફસ્ટાઈલની ચર્ચાઓ અવારનવાર થતી રહે છે. દિલ્હીના આ શાહી ઘર ઉપરાંત કેરળમાં પણ એક્ટ્રેસની પ્રોપર્ટી હોવાના અહેવાલો સામે આવતા રહે છે. ફિલ્મોમાં ભલે તે હવે ન દેખાતી હોય, પરંતુ અસિનની આ રિઅલ લાઈફ ફેરી ટેલ સ્ટોરી આજે પણ તેના ચાહકોમાં ભારે આકર્ષણનું કેન્દ્ર બની રહે છે.
