અમેરિકાની ઇમિગ્રેશન એન્ડ કસ્ટમ્સ એનફોર્સમેન્ટ સંસ્થાએ હરિયાણાના કુખ્યાત મોસ્ટ વોન્ટેડ ગેંગસ્ટર હિમાંશુ ભાઉ ઉર્ફે હિમાંશુ રિતોલિયાની નેવાડા રાજ્યમાંથી ધરપકડ કરી છે. તેની સાથે તેના સાથીદાર નીરજ ફરીદપુરિયાને પણ કસ્ટડીમાં લેવામાં આવ્યો છે. ભારતમાં હત્યા, હત્યાનો પ્રયાસ, ખંડણી અને જાનથી મારી નાખવાની ધમકી જેવા ગંભીર ગુનાઓ હેઠળ અઢારથી વધુ કેસોમાં હિમાંશુ વોન્ટેડ હતો. આ કુખ્યાત ગેંગસ્ટર વિરુદ્ધ વર્ષ બે હજાર ત્રેવીસના ઓગસ્ટ મહિનાથી ઇન્ટરપોલનું રેડ નોટિસ પણ જારી કરવામાં આવ્યું હતું. અમેરિકાના નેવાડા ખાતે આવેલા હેન્ડરસન ડિટેન્શન સેન્ટરમાં બંનેની અટકાયત કરવામાં આવી હોવાની સત્તાવાર પુષ્ટિ કરવામાં આવી છે.
આ કુખ્યાત ગેંગ ઉત્તર ભારતમાં અનેક હાઈ-પ્રોફાઈલ ગુનાઓ સાથે સંકાયેલી રહી છે. તાજેતરમાં આ ગેંગે સોશિયલ મીડિયા સ્ટાર એલ્વિશ યાદવના ગુરુગ્રામ સ્થિત નિવાસસ્થાન બહાર ફાયરિંગ કરવાની ઘટનાની જવાબદારી સ્વીકારી હતી. ભારતીય સુરક્ષા એજન્સીઓ લાંબા સમયથી તેની ભાળ મેળવવાનો પ્રયાસ કરી રહી હતી. ગુરુવારે અમેરિકન એજન્સીઓએ લોસ વેગાસ પાસેથી તેને ઝડપી લીધો હતો. સૂત્રોના જણાવ્યા અનુસાર, નીરજ ફરીદપુરિયા અગાઉ જામીન પર છૂટ્યા બાદ પોતાના પગમાં પહેરેલું ટ્રેકિંગ ડિવાઈસ હટાવીને ફરી રહ્યો હતો, જેને પગલે તેની પણ ફરીથી અટકાયત કરવામાં આવી છે.
ભારત સરકાર આ બંને વોન્ટેડ અપરાધીઓને વહેલી તકે દેશમાં પરત લાવવા માટે પ્રત્યાર્પણ અને ડિપોર્ટેશનની કાર્યવાહીને ઝડપી બનાવી રહી છે. કાયદાકીય પ્રક્રિયાના ભાગરૂપ ભારતીય અધિકારીઓની એક ટીમ અમેરિકા પ્રવાસે જઈ શકે તેવી સંભાવના છે. સામાન્ય રીતે લાંબી કાનૂની પ્રક્રિયા ધરાવતા પ્રત્યાર્પણ સંધિ કરતા ઇમિગ્રેશન કાયદા દ્વારા ગુનેગારોને પરત લાવવાની પ્રક્રિયા વધુ ઝડપી બનતી હોય છે. હાલમાં બંને આરોપીઓ વિરુદ્ધ અમેરિકાની ધરતી પર કોઈ ફોજદારી ગુનો નોંધાયો નથી, પરંતુ તેમની ઇમિગ્રેશન કાર્યવાહીના પરિણામ પર જ તેમનું ભારત પરત ફરવું નિર્ભર રહેશે. આ કાર્યવાહી પૂર્ણ થયા બાદ ભારતીય તપાસ એજન્સીઓ તેમને કસ્ટડીમાં લઈને કાયદેસરની સખત કાર્યવાહી હાથ ધરશે.
