તુર્કીના રક્ષા મંત્રી યાસર ગુલરે સ્પષ્ટ કર્યું છે કે સાઉદી અરેબિયા અને પાકિસ્તાન સાથેના નવા રક્ષા કરાર હેઠળ તેમના દેશની સેના યેમેનના ઈરાન સમર્થિત હૂતી વિદ્રોહીઓ સાથે કોઈ પણ પ્રકારના સશસ્ત્ર સંઘર્ષમાં સામેલ થશે નહીં. એક ટેલિવિઝન સાક્ષ્ાાત્કારમાં તેમણે જણાવ્યું હતું કે તુર્કી દ્વારા સાઉદી અરેબિયાને આપવામાં આવનાર સૈન્ય સમર્થનનો મુખ્ય ઉદ્દેશ્ય માત્ર પ્રાદેશિક પ્રતિરોધક શક્તિને મજબૂત કરવાનો છે, જેવી જ વ્યવસ્થા અગાઉ કતાર સાથે પણ કરવામાં આવી હતી. આનાથી પશ્ચિમ એશિયામાં તુર્કીની રક્ષા નીતિ અંગે ચાલી રહેલી ચર્ચાઓને નવો વેગ મળ્યો છે.
તાજેતરમાં હસ્તાક્ષર પામેલા અને સંસદમાં મંજૂરી માટે રજૂ કરાયેલા 'મક્કા સંયુક્ત રક્ષા કરાર' અંતર્ગત તુર્કી, સાઉદી અરેબિયા અને પાકિસ્તાન વચ્ચે સામૂહિક સુરક્ષાની પ્રતિબદ્ધતા વ્યક્ત કરવામાં આવી છે. આ કરાર મુજબ, ત્રણેય દેશોમાંથી કોઈપણ એક રાષ્ટ્ર પર થયેલો સશસ્ત્ર હુમલો તમામ દેશો પરનો હુમલો ગણવામાં આવશે. જો કે, રક્ષા મંત્રીએ એ પણ સ્પષ્ટ કર્યું છે કે તુર્કીની સંસદ દ્વારા આ કરારની સત્તાવાર પુષ્ટિ થયા બાદ જ સાઉદી અરેબિયા તરફથી મળનારી સૈન્ય સહાયની વિનંતીઓનું મૂલ્યાંકન કરવામાં આવશે અને કાયદાકીય પ્રક્રિયા તેમજ સંસદીય મંજૂરીના આધારે જ આગળના પગલાં લેવાશે.
આ રક્ષા કરારને લઈને આંતરરાષ્ટ્રીય સ્તરે વિવિધ અટકળો લગાવવામાં આવી રહી હતી, પરંતુ તુર્કીના વલણથી સ્પષ્ટ થઈ ગયું છે કે તેનો હેતુ આક્રમક કાર્યવાહીનો નહીં, પરંતુ માત્ર સંરક્ષણ અને ક્ષેત્રીય સ્થિરતા જાળવવાનો છે. વિશ્લેષકોના મતે, આ સમજૂતીથી મધ્ય પૂર્વના દેશોમાં સુરક્ષા ક્ષેત્રે સહકાર વધશે, પરંતુ તુર્કી સીધા સૈન્ય સંઘર્ષમાં ઉતરવાનું ટાળીને પોતાની વિદેશ નીતિને સંતુલિત રાખવા માંગે છે. આગામી દિવસોમાં તુર્કીની સંસદમાં આ કરાર પર થનારી ચર્ચા અને તેના અનુમોદન પર સમગ્ર વિશ્વની નજર રહેશે.
