રાષ્ટ્રીય સ્વયંસેવક સંઘના વડા મોહન ભાગવતે વર્તમાન સમયની રાજકીય અને સામાજિક પરિસ્થિતિઓ પર ગંભીર ચિંતા વ્યક્ત કરતા વિપક્ષ અને આંદોલનકારીઓને સ્પષ્ટ શબ્દોમાં ચેતવણી આપી છે. તેમણે જણાવ્યું છે કે આપણા દેશમાં પણ ફ્રાન્સ, બાંગ્લાદેશ, નેપાળ અને અલ્બાનિયા જેવી અરાજકતાવાળી પરિસ્થિતિઓ ઊભી કરવાના નિરંતર પ્રયાસો થઈ રહ્યા છે. આંતરરાષ્ટ્રીય સ્તરે ભારતની વધતી શક્તિથી ડરેલી કેટલીક વૈશ્વિક શક્તિઓ સક્રિય થઈને દેશને દબાવવાના અને અસ્થિર કરવાના ષડયંત્રો રચી રહી છે. આવી બાહ્ય અને આંતરિક તાકાતોનો મુખ્ય હેતુ વાસ્તવિક સમસ્યાઓનું નિરાકરણ લાવવાનો નથી, પરંતુ સત્તા પરિવર્તન કરીને પોતાના સ્વાર્થ સાધવાનો છે.
લોકશાહી વ્યવસ્થામાં વિરોધ અને આંદોલનો થવા એ સ્વાભાવિક બાબત છે, પરંતુ આંદોલનનો મૂળ ઉદ્દેશ્ય હંમેશાં સમસ્યાનું રચનાત્મક સમાધાન લાવવાનો હોવો જોઈએ, નહીં કે સમગ્ર સમાજમાં વિભાજન પેદા કરવાનો. જ્યારે કોઈ વિરોધ પ્રદર્શન કે આંદોલન કોઈ ગુપ્ત સ્વાર્થ કે અન્ય લક્ષ્યોને ધ્યાનમાં રાખીને સંચાલિત થાય છે, ત્યારે તે રાજનીતિનું હથિયાર બનીને સમાજમાં પરસ્પર શત્રુભાવ અને અશાંતિ ભડકાવવાનું કામ કરે છે. આપણા અખંડ અને વિશાળ સમાજમાં કોઈ પણ પ્રકારની કુસંપ, દ્વેષ કે કડવાશ ન ફેલાય તેની ખાસ કાળજી રાખવી દેશના પ્રત્યેક નાગરિકની પવિત્ર ફરજ છે.
વધુમાં તેમણે ભારપૂર્વક જણાવ્યું હતું કે કેટલાક તત્વો સતત ભારત અને હિન્દુ સમાજને તોડવાના પ્રયાસો કરી રહ્યા છે, જેને આવા જ સ્વાર્થી નેતાઓનું સમર્થન પણ પ્રાપ્ત થાય છે. આ પ્રકારની શક્તિઓ નાનીમોટી બાબતો અને મતભેદોને મનભેદમાં ફેરવીને જનમાનસમાં અન્યાયની લાગણી ઊભી કરે છે. તેઓ દેશની ન્યાયિક અને બંધારણીય વ્યવસ્થાઓ પ્રત્યે અશ્રદ્ધા ફેલાવીને અરાજકતાનું વાતાવરણ સર્જવાની કાર્યપદ્ધતિ અપનાવી રહ્યા છે. ભારતનું વૈશ્વિક સ્તરે પ્રભુત્વ વધવું આવી વિરોધી શક્તિઓ માટે મોટો અવરોધ સમાન છે, જેના કારણે તેઓ આવા નીચલા સ્તરના ખેલ રમી રહી છે. દેશની જનતાએ આ તમામ જોખમોને પારખીને એક થઈને મજબૂતાઈથી ઊભા રહેવાની આવશ્યકતા છે.
