દિવાળી અને તહેવારોની સિઝનમાં આપણા ઘરોમાં પૂજા-પાઠનું વિશેષ મહત્ત્વ હોય છે. નવરાત્રિથી માંડીને દિવાળી સુધીના પવિત્ર દિવસોમાં શ્રદ્ધાળુઓ દ્વારા મંદિરમાં ભગવાનને અસંખ્ય ફૂલો અર્પણ કરવામાં આવે છે. પૂજા વિધિ પૂર્ણ થયા બાદ જ્યારે આ ફૂલો સુકાઈ જાય છે, ત્યારે મોટાભાગના લોકો તેને કચરામાં ફેંકી દેતા હોય છે. પરંતુ, શું તમે જાણો છો કે આ પવિત્ર ફૂલોને ફેંકી દેવાને બદલે તેનો ઉત્તમ ઉપયોગ કરીને ઘરમાં જ સુગંધિત ધૂપના કોન તૈયાર કરી શકાય છે? આ એક સુંદર અને પર્યાવરણને અનુકૂળ રીત છે, જેનાથી ઘરમાં પૂજાની સુવાસ કાયમ જળવાઈ રહે છે.
આ અનોખી અને સરળ રીત વિશે વાત કરતાં જાણીતા રસોઈ નિષ્ણાત પંકજ ભદૌરિયાએ ઘરમાં જ શુદ્ધ ધૂપ બનાવવાની પદ્ધતિ શેર કરી છે. આ માટે બજારમાંથી કોઈ મોંઘી સામગ્રી ખરીદવાની જરૂર પડતી નથી. સૌથી પહેલાં પૂજામાં ચઢાવેલાં ગુલાબનાં ફૂલોમાંથી સ્વચ્છ પાંખડીઓને અલગ કરી લેવાની રહે છે. આ પાંખડીઓને તડકામાં સારી રીતે સૂકવી લેવી પડે છે. જો તમારે તેને ઝડપથી સૂકવવી હોય, તો કોઈ કઢાઈ કે પેનમાં ધીમા તાપે હળવી શેકી શકાય છે, પરંતુ વિશેષ ધ્યાન રાખવું કે પાંખડીઓ બળીને કાળી ન થઈ જાય.
પાંખડીઓ સંપૂર્ણપણે સૂકાઈ જાય ત્યારબાદ મિક્સરની મદદથી તેને પીસીને એકદમ બારીક પાવડર તૈયાર કરવામાં આવે છે. આ ગુલાબના પાઉડરની સાથે હવન સામગ્રી, કપૂરનો ભૂકો અને શુદ્ધ દેશી ઘી ઉમેરીને એક સરસ મિશ્રણ તૈયાર કરવામાં આવે છે. આ તમામ સામગ્રીના મિશ્રણને બરાબર ગૂંથીને તેના નાના-નાના ધૂપના કોન કે અગરબત્તીનો આકાર આપવામાં આવે છે. થોડો સમય તેને સૂકવવા દેવાથી તે ઉપયોગ માટે તૈયાર થઈ જાય છે. આમ, ઘરે જ તૈયાર થયેલા આ કુદરતી અને સુગંધિત ધૂપથી ઘરનું વાતાવરણ પવિત્ર બને છે અને કચરાનો યોગ્ય નિકાલ પણ થઈ શકે છે.
