ચોમાસાની વિદાય બાદ સામાન્ય રીતે રાજ્યમાં ધીમે-ધીમે ગુલાબી ઠંડીનું આગમન થતું હોય છે, પરંતુ આ વર્ષે અલનીનોની પ્રતિકૂળ અસરને પગલે શિયાળો બેસવાને બદલે રાજ્યભરમાં ધોમધખતો તાપ વરસી રહ્યો છે. સૌરાષ્ટ્રના પાટનગર ગણાતા રાજકોટ શહેરમાં ઓક્ટોબર મહિનાની ગરમીએ છેલ્લા ચોવીસ વર્ષ જૂનો રેકોર્ડ તોડી નાખ્યો છે. શહેરમાં સામાન્ય દિવસો કરતાં તાપમાનમાં ૪.૪ ડિગ્રી સેલ્સિયસનો તોતિંગ વધારો નોંધાયો હતો અને મહત્તમ પારો ૪૦.૬ ડિગ્રી સેલ્સિયસે પહોંચી ગયો હતો. આ આંકડા સાથે રાજકોટ સમગ્ર ગુજરાતનું સૌથી ગરમ શહેર બન્યું છે. અગાઉ વર્ષ ૨૦૦૨ના ઓક્ટોબરમાં સર્વાધિક ૪૧.૯ ડિગ્રી તાપમાન નોંધાયું હતું, ત્યારબાદ આટલી આકરી ગરમી પ્રથમ વખત નોંધાઈ છે.
રાજકોટ ઉપરાંત સમગ્ર રાજ્યમાં ઓક્ટોબર હીટનો આકરો પ્રકોપ જોવા મળી રહ્યો છે. હવામાન વિભાગના આંકડા અનુસાર ડીસામાં ૩૯.૬ ડિગ્રી, સુરેન્દ્રનગરમાં ૩૯.૨ ડિગ્રી જ્યારે ભુજ અને કેશોદમાં ૩૯ ડિગ્રી મહત્તમ તાપમાન નોંધાયું હતું. આ ઉપરાંત અમરેલીમાં ૩૮.૫ ડિગ્રી, પોરબંદરમાં ૩૮.૨ ડિગ્રી, અમદાવાદમાં ૩૮.૧ ડિગ્રી, વડોદરા અને સુરતમાં ૩૭.૮ ડિગ્રી પારો રહ્યો હતો. રાજ્યના અન્ય નગરો જેવા કે વલ્લભ વિદ્યાનગરમાં ૩૭.૫, વેરાવળમાં ૩૭.૧, ભાવનગરમાં ૩૭, મહુવામાં ૩૬.૮, કંડલા બંદરે ૩૬.૬, ગાંધીનગરમાં ૩૬.૪, નલિયામાં ૩૬.૨, ઓખામાં ૩૨.૨ અને દ્વારકામાં ૩૧.૪ ડિગ્રી તાપમાન નોંધાયું હતું. બપોરના સમયે કાળઝાળ ધૂપને કારણે માર્ગો પર લોકોની ચહલપહલ ઘટી ગઈ હતી.
બીજી તરફ રાજ્યના લઘુત્તમ તાપમાન પર નજર કરીએ તો સૌથી નીચું તાપમાન નલિયામાં ૨૨ ડિગ્રી નોંધાયું હતું. આ સિવાય મહુવામાં ૨૩.૭, અમરેલીમાં ૨૪.૨, કેશોદમાં ૨૪.૫, ગાંધીનગર અને પોરબંદરમાં ૨૫, રાજકોટમાં ૨૫.૪, ભુજમાં ૨૫.૬ તેમજ ભાવનગરમાં ૨૫.૮ ડિગ્રી લઘુત્તમ તાપમાન નોંધાયું હતું. વડોદરા અને કંડલામાં ૨૬, સુરતમાં ૨૬.૧, દ્વારકા-ઓખામાં ૨૬.૨, ડીસામાં ૨૬.૪ જ્યારે અમદાવાદ, વલ્લભ વિદ્યાનગર અને વેરાવળમાં ૨૬.૬ ડિગ્રી તેમજ સુરેન્દ્રનગરમાં ૨૭ ડિગ્રી લઘુત્તમ પારો રહ્યો હતો. દિવસ દરમિયાન અંગ દઝાડતી ગરમી અને રાત્રિના સમયે હળવી ઠંડકને લીધે બેવડી ઋતુનો અનુભવ થઈ રહ્યો છે, જેના કારણે નાગરિકોમાં ઋતુજન્ય બીમારીઓ વધવાની શક્યતા સેવાઈ રહી છે.
