રાજ્યભરની સરકારી શાળાઓમાં વ્યવસાયિક શિક્ષણ આપતા આશરે ૪,૦૦૦ જેટલા વોકેશનલ ટ્રેનરો પોતાના પડતર પ્રશ્નો અને આર્થિક શોષણ સામે મેદાને પડ્યા છે. પાટનગર ગાંધીનગર ખાતે મોટી સંખ્યામાં એકત્ર થયેલા ટ્રેનરોએ સરકાર સમક્ષ પોતાની ગંભીર વ્યથા રજૂ કરી છે. પાંચ વર્ષનો સેવા કરાર પૂર્ણ થઈ જવા છતાં તેમના ભવિષ્ય અંગે સરકારી તંત્ર દ્વારા કોઈ નક્કર નીતિ કે કાયમી ધોરણ નક્કી કરવામાં ન આવતા ટ્રેનરોમાં ભારે અસંતોષ અને અનિશ્ચિતતાનો માહોલ સર્જાયો છે. પોતાના હક્ક માટે અવાજ ઉઠાવી રહેલા આ શિક્ષકોએ હવે ન્યાય ન મળે તો રાજ્યવ્યાપી આંદોલન છેડવાની સ્પષ્ટ ચીમકી ઉચ્ચારી છે.
આંદોલનકારી ટ્રેનરોનો મુખ્ય આક્ષેપ એજન્સી પ્રથા અને તેના કારણે થઈ રહેલા અસહ્ય વેતન કાપ સામે છે. અગાઉ આ ટ્રેનરોને દર મહિને ₹૨૧,૦૦૦ જેટલો પગાર ચૂકવવામાં આવતો હતો. જોકે, વચેટિયા સમાન ખાનગી એજન્સીઓ બદલાતા જ નિયમોમાં પણ મનસ્વી ફેરફાર કરી દેવાયા હતા. હવે રવિવાર, જાહેર રજાઓ તેમજ વિદ્યાર્થીઓના વેકેશનના દિવસોનું મહેનતાણું કાપી લેવામાં આવે છે. આ આકરા નિયમોને કારણે ટ્રેનરોના હાથમાં મહિને માંડ ₹૧૪,૦૦૦ થી ₹૧૫,૦૦૦ જેટલી રકમ આવી રહી છે. વર્તમાન આકરી મોંઘવારીના દોરમાં આટલા અલ્પ વેતનમાં કુટુંબનું ભરણપોષણ કરવું અત્યંત કપરું બન્યું છે.
સમગ્ર ગુજરાતમાંથી રજૂઆત કરવા પહોંચેલા પ્રતિનિધિઓએ એકસૂરે માંગણી કરી છે કે, ટ્રેનરોનું આર્થિક શોષણ કરતી એજન્સી પ્રથાને તાત્કાલિક અસરથી નાબૂદ કરવામાં આવે અને તમામ ટ્રેનરોને યોગ્ય માસિક ફિક્સ પગારનું ધોરણ લાગુ કરવામાં આવે. આ મામલે શિક્ષણ વિભાગના જવાબદાર ઉચ્ચ અધિકારીઓને વિસ્તૃત આવેદનપત્ર પાઠવી તાકીદે હકારાત્મક ઉકેલ લાવવા આગ્રહ કરાયો છે. અધિકારીઓ તરફથી ટૂંક સમયમાં યોગ્ય નિર્ણય લેવાની ખાતરી આપવામાં આવી છે, પરંતુ જો સરકાર દ્વારા તેમની વાજબી માંગણીઓ નહીં સ્વીકારાય તો આગામી દિવસોમાં ઉગ્ર વિરોધ પ્રદર્શન કરવાની તૈયારી દર્શાવવામાં આવી છે.
