રાજકોટના આજી ઔદ્યોગિક વસાહત (જીઆઈડીસી) વિસ્તારમાં બુધવારે સમી સાંજે તન્વી એક્સપોર્ટ પેઢીના મેનેજર લાલાજીભાઇ સરધારા પર ગોળીબાર કરી તેમની કરપીણ હત્યા નિપજાવી રૂપિયા ૧.૫૩ કરોડથી વધુના સોના અને ચાંદીની સનસનીખેજ લૂંટ ચલાવવામાં આવી હતી. આ ચકચારી લૂંટ વિથ મર્ડર કેસમાં પોલીસે અત્યંત ત્વરિત અને સંયુક્ત ઓપરેશન હાથ ધરીને ગણતરીના માત્ર નવ કલાકના ટૂંકા ગાળામાં સમગ્ર ગુનાનો ભેદ ઉકેલી નાખ્યો છે. આ કેસમાં ટેકનિકલ સર્વેલન્સ અને આંતરરાજ્ય સંકલન સાધીને મુખ્ય સૂત્રધાર સહિત કુલ ૧૦ આરોપીઓની ધરપકડ કરવામાં આવી છે તેમજ લૂંટાયેલા મુદ્દામાલ સહિત કુલ ૧.૫૭ કરોડથી વધુની મિલકત કબજે કરવામાં મોટી સફળતા મળી છે.
ઘટના બાદ સીસીટીવી કેમેરા અને બાતમીદારોની મદદથી તપાસ હાથ ધરતા ગુનામાં વપરાયેલી એક કાર શંકાસ્પદ જણાઈ હતી. આ વાહન પરપ્રાંતનું હોવાથી સરહદી જિલ્લાઓ અને રાજસ્થાન પોલીસને તાબડતોબ એલર્ટ કરવામાં આવી હતી. જેના આધારે રાજસ્થાનના સિરોહી જિલ્લાના પિંડવાડા ખાતેથી સ્થાનિક પોલીસે કાર સાથે ચાર શખ્સોને દબોચી લીધા હતા. તેઓની આકરી પૂછપરછમાં અન્ય આરોપીઓ મુદ્દામાલ લઈને બીજી કારમાં ભાગ્યા હોવાનું બહાર આવતાં, ઉદયપુરના બડગાંવ વિસ્તારમાંથી વધુ બે આરોપીઓને મુદ્દામાલ સાથે પકડી પાડવામાં આવ્યા હતા. ત્યારબાદ કચ્છના સામખિયાળી તેમજ રાજકોટ ખાતેથી અન્ય સાગરિતોને ઝડપી લઈને ૯૪૬ ગ્રામ સોનાના ઢાળિયા, ચાંદીનો પાવડર, બે કાર અને મોબાઈલ સહિતનો તમામ મુદ્દામાલ જપ્ત કરાયો હતો.
પોલીસ તપાસમાં બહાર આવેલી વિગતો મુજબ આ લૂંટનું ષડયંત્ર છેલ્લા પાંચ મહિનાથી ઘડાઈ રહ્યું હતું. પેઢીમાંથી પાંચ માસ પૂર્વે નોકરીમાંથી કાઢી મુકાયેલા પૂર્વ કર્મચારી અશ્વિનીકુમાર ઉર્ફે લંકેશ રાજપૂતે બદલો લેવા અને લૂંટ ચલાવવા પૂરતી યોજના બનાવી હતી. પેઢીમાં હાલ ફરજ બજાવતા અન્ય કર્મચારી શૈલેષ ખરવારે સોનાની હેરાફેરી અંગે ચોક્કસ બાતમી આપી હતી, જેના આધારે આ ઘાતકી ગુનો આચરવામાં આવ્યો હતો. ઝડપાયેલા તમામ આરોપીઓ મૂળ ઉત્તર પ્રદેશના રહેવાસી છે અને કેટલાક રીઢા ગુનેગારો પણ છે. આ અંધાધૂંધ લૂંટ અને હત્યાનો કેસ ગણતરીના કલાકોમાં ઉકેલી લેવા બદલ ગૃહ વિભાગ દ્વારા પોલીસ ટીમની કામગીરીને બિરદાવવામાં આવી છે.
