કેરળના ત્રિશૂર જિલ્લામાં એક સગીરાને પ્રેમજાળમાં ફસાવી તેની અંગત તસવીરો મેળવી બ્લેકમેલ કરવાનો અને મોટા પાયે તોડબાજી કરવાનો ચકચારી કિસ્સો સામે આવ્યો છે. આ મામલામાં કોડુંગલ્લુર નજીક એરિશેપ્પલમના રહેવાસી સાહલ અને મોહમ્મદ અસલમ નામના બે સગા ભાઈઓ સામે ગુનો નોંધાયો છે. આરોપીઓએ સગીરાને બદનામ કરવાની ધમકી આપીને પરિવાર પાસેથી ૨૦ તોલા સોનું અને પચાસ હજાર રૂપિયાની રોકડ પડાવી લીધી હતી. આ ગંભીર ગુનામાં સંડોવાયેલા એક આરોપીએ તાજેતરમાં આપઘાત કરી લેતાં સમગ્ર મામલાએ નાટકીય વળાંક લીધો છે. મૃતકના પરિવારે પોલીસ ત્રાસના કારણે પુત્રએ આ પગલું ભર્યું હોવાનો આક્ષેપ કર્યો છે, જેની સામે પીડિતાના પરિવારે હવે ઓડિયો પુરાવા જાહેર કરીને તોડબાજીના ષડયંત્રનો પર્દાફાશ કર્યો છે.
વિદેશમાં રહેતી પીડિત સગીરાની મોટી બહેને વીડિયો સંદેશ જાહેર કરીને તમામ વિગતો સામે રાખી છે. તેણે જણાવ્યું હતું કે પરિવાર પાસે તમામ ઓડિયો રેકોર્ડિંગ, ધમકીભર્યા સંદેશાઓના સ્ક્રીનશોટ અને પોલીસ ફરિયાદની પહોંચ ઉપલબ્ધ છે, જે અદાલતમાં રજૂ કરવામાં આવશે. સામે આવેલા ઓડિયો રેકોર્ડિંગમાં આરોપીઓ વધુ નાણાં પડાવવા માટે ધમકીઓ આપતા અને વિદેશમાં રહેતી બહેનને ઇન્સ્ટાગ્રામ દ્વારા માનસિક ત્રાસ આપતા હોવાનું સ્પષ્ટ સંભળાય છે. આ ઉપરાંત એક આરોપી સગીરાના ઘરે પહોંચી ગયો હતો અને દરવાજો તેના માતા-પિતાએ ખોલતાં હવા ભરવાનો પંપ લેવા આવ્યાનું બહાનું કાઢી નીકળી ગયો હતો. બાદમાં તેણે આ સમગ્ર ઘટનાનો વીડિયો બનાવી બહેનને મોકલી ડરાવવાનો પ્રયાસ કર્યો હોવાનો પણ ઘટસ્ફોટ થયો છે.
પોલીસ તપાસમાં બહાર આવ્યું છે કે પડાવી લેવાયેલા દાગીનામાંથી નવ તોલા સોનું વેચીને આરોપીઓએ એક લક્ઝરી કાર ખરીદી હતી, જ્યારે બે લાખ રૂપિયા એક મિત્રની બહેનના લગ્ન માટે આપ્યા હતા તથા બાકીની રકમમાંથી બે કિંમતી મોબાઈલ ફોન ખરીદવામાં આવ્યા હતા. આ સોનું વેચવામાં મદદ કરનાર બેંગલુરુના એક સાગરીતની પણ સઘન પૂછપરછ ચાલી રહી છે. સૌથી ચોંકાવનારી બાબત એ છે કે આરોપીઓના ફોનની ફોરેન્સિક તપાસ દરમિયાન અન્ય કેટલીક અજાણી યુવતીઓના ફોટોગ્રાફ્સ અને માહિતી મળી આવી છે. જેના પગલે તપાસનીશ અધિકારીઓ હવે એ દિશામાં તપાસ કરી રહ્યા છે કે આ ટોળકી દ્વારા અન્ય કેટલી યુવતીઓને આ જ પ્રકારે શિકાર બનાવી બ્લેકમેલ કરવામાં આવી હતી.
