ગૃહ રાજ્યમંત્રી હર્ષ સંઘવીની સુરતથી મોટી જાહેરાત, ‘ભક્તિને ખલેલ પહોંચાડનારા ગીતો નહીં ચલાવી લેવાય’ કહી આયોજકોને કડક સૂચના
રાજ્યભરમાં પોલીસને ખડેપગે રહેવા આદેશ, મહિલાઓની સુરક્ષા માટે 112 હેલ્પલાઇન 24×7 કાર્યરત રહેશે, ઓપરેશન સિંદૂર અને આત્મનિર્ભરતાના નારા સાથે આ વર્ષની નવરાત્રિ બનશે વિશેષ
આદ્યશક્તિની આરાધનાના પર્વ નવરાત્રિના પ્રારંભની પૂર્વ સંધ્યાએ રાજ્યના લાખો ખેલૈયાઓ માટે આનંદના સમાચાર આવ્યા છે. ગુજરાતના ગૃહ રાજ્યમંત્રી શ્રી હર્ષ સંઘવીએ સુરત ખાતેથી એક મહત્વપૂર્ણ જાહેરાત કરતાં જણાવ્યું છે કે, આ વર્ષે ખેલૈયાઓ કોઈપણ ચિંતા વિના મોડી રાત સુધી ગરબાની રમઝટ બોલાવી શકશે. આ જાહેરાત સાથે તેમણે સમગ્ર રાજ્યના પોલીસ તંત્રને નાગરિકોની સુવિધા અને સુરક્ષા માટે વિશેષ વ્યવસ્થા ગોઠવવા કડક સૂચનાઓ આપી છે, જેથી નવરાત્રિનો ઉત્સવ સૌના માટે યાદગાર બની રહે. આ સાથે જ તેમણે કોમર્શિયલ ગરબા આયોજકોને સ્પષ્ટ શબ્દોમાં ચીમકી પણ આપી છે કે વ્યવસ્થામાં કોઈપણ પ્રકારની ઉણપ ચલાવી લેવામાં આવશે નહીં અને માં અંબાની ભક્તિને ખલેલ પહોંચે તેવા કોઈપણ ગીતો કે કૃત્યને સાંખી લેવામાં આવશે નહીં.ગૃહ રાજ્યમંત્રી હર્ષ સંઘવીએ પોતાના આગવા અંદાજમાં જણાવ્યું હતું કે, “માં અંબાની ભક્તિ, ઓપરેશન સિંદૂરની શક્તિ, આત્મનિર્ભર બનીએ નસ નસથી. મોડી રાત સુધી ખેલૈયાઓ ગરબા રમશે પૂરા હકથી.” તેમણે ઉમેર્યું કે ગુજરાતની ધરતી પર માં અંબાની ભક્તિ કરનાર લાખો શ્રદ્ધાળુઓ અને ખેલૈયાઓ મોડી રાત્રિ સુધી ઉત્સાહભેર ગરબા રમી શકે તે માટે રાજ્યના તમામ શહેર પોલીસ કમિશનરો અને જિલ્લા પોલીસ અધિક્ષકોને સંપૂર્ણ વ્યવસ્થા સુનિશ્ચિત કરવા માટે આદેશ આપી દેવામાં આવ્યા છે. એટલું જ નહીં, આ તહેવાર માત્ર ખેલૈયાઓ માટે જ નહીં, પરંતુ નાના-નાના વેપારીઓ અને સ્થાનિક કારીગરો માટે પણ આશીર્વાદરૂપ બને તે માટે પણ સરકાર કટિબદ્ધ છે. શહેરો અને જિલ્લાઓમાં રાત-દિવસ મહેનત કરીને નાની-મોટી ચીજવસ્તુઓ વેચતા કે ખાણી-પીણીના સ્ટોલ ચલાવતા હજારો પરિવારો માટે “નવરાત્રિ જ દિવાળી બની જાય” તેવી વ્યવસ્થા ગોઠવવા પણ પોલીસને સૂચના આપવામાં આવી છે, જેથી સ્થાનિક અર્થતંત્રને વેગ મળે.આ વર્ષની નવરાત્રિને વિશેષ ગણાવતા શ્રી સંઘવીએ કહ્યું કે, આ વખતે માં અંબાની ભક્તિ સાથે ‘ઓપરેશન સિંદૂર’ની શક્તિ પણ જોડાયેલી છે અને ‘આત્મનિર્ભર ભારત’ તથા ‘સ્વદેશી અપનાવવા’ના નારા સાથે સમગ્ર દેશ એક અલગ જ મૂડમાં છે. તેમણે કોમર્શિયલ ગરબાના આયોજકોને તાકીદ કરી છે કે ગરબા રમવા આવતા તમામ ભાઈઓ, બહેનો અને પરિવારજનો માટે સુરક્ષા અને સુવિધાની ઉત્તમ વ્યવસ્થા ગોઠવવાની સંપૂર્ણ જવાબદારી તેમની રહેશે અને તેમાં સહેજ પણ ઢીલાશ ચલાવી લેવામાં આવશે નહીં. તેમણે ભારપૂર્વક જણાવ્યું કે, “આપણા રાજ્યની સંસ્કૃતિ અને માં અંબાના ગરબાની ગરિમા જળવાઈ રહે તે અત્યંત જરૂરી છે. લાખો લોકો જ્યારે ભક્તિભાવ સાથે આવતા હોય, ત્યારે ભક્તિને ખલેલ પહોંચે તેવી કોઈપણ ઘટના કે એ પ્રકારના ગીતો ચલાવી લેવાશે નહીં. આ સંસ્કૃતિનું જતન કરવું એ આપણા સૌની સહિયારી જવાબદારી છે.”મહિલાઓ અને દીકરીઓની સુરક્ષા પર વિશેષ ભાર મૂકતા ગૃહમંત્રીએ તમામને નિર્ભય બનીને ગરબા રમવા જવા અપીલ કરી હતી. તેમણે ખાતરી આપતા કહ્યું કે, “તમારે કોઈપણ પ્રકારની ચિંતા કરવાની જરૂર નથી. જો તમને ક્યાંય પણ નાની-સરખી તકલીફ જણાય, જેમકે રસ્તામાં તમારું એક્ટિવા બંધ પડી ગયું હોય અને ઘરે કેવી રીતે પહોંચવું તેની ચિંતા હોય, તો પણ ગભરાશો નહીં. તમારી સેવામાં ગુજરાત પોલીસ હંમેશા ઉપલબ્ધ છે.” તેમણે તમામ બહેનો-દીકરીઓને વિનંતી કરી કે કોઈપણ મુશ્કેલીના સંજોગોમાં વગર વિચાર્યે તાત્કાલિક 112 નંબર પર ફોન કરીને માત્ર જાણકારી આપી દેવી, જેથી પોલીસની ટીમ ઝડપથી મદદ માટે પહોંચી શકે. તેમણે સૌને પોતાના માતા-પિતા અને પરિવારજનોને પોતાના આવવા-જવાની સંપૂર્ણ માહિતી આપવા પણ અનુરોધ કર્યો, જેથી કોઈપણ ગેરવ્યાજબી તત્વો વ્યવસ્થાનો ફાયદો ઉઠાવી ન શકે. અંતમાં, તેમણે સૌને નવરાત્રિની શુભેચ્છાઓ પાઠવી અને સંપૂર્ણ શક્તિ તથા ઉમંગથી ગરબા રમવા માટે પ્રોત્સાહિત કર્યા.
