ગુજરાત સરકારે અબોલ પશુધનની સુખાકારી અને સંવર્ધન માટે એક અત્યંત પ્રશંસનીય અને ક્રાંતિકારી નિર્ણય લીધો છે. રાજ્યપાલ આચાર્ય દેવવ્રત દ્વારા વિધિવત મંજૂરીની મહોર મારવામાં આવતાં જ 'ગુજરાત પશુધન આહાર, મરઘાં-ચણ અને ખનિજ મિશ્રણ (ઉત્પાદન, સંગ્રહ, વિતરણ, વેચાણ અને ગુણવત્તા નિયંત્રણ) અધિનિયમ, ૨૦૨૬' આજથી સમગ્ર રાજ્યમાં સત્તાવાર રીતે લાગુ થઈ ગયો છે. તાજેતરમાં વિધાનસભામાં પસાર કરાયેલા આ વિધેયકના કાયદાકીય અમલ સાથે જ ગુજરાત પશુ કલ્યાણ અને ગુણવત્તા નિયંત્રણ ક્ષેત્રે દેશભરમાં અગ્રેસર બન્યું છે.
આ નૂતન કાયદાનો મુખ્ય ઉદ્દેશ્ય પશુઓ અને પક્ષીઓને ભેળસેળમુક્ત, પોષકતત્વોથી ભરપૂર અને ગુણવત્તાસભર આહાર સુનિશ્ચિત કરવાનો છે. અગાઉ ગુણવત્તાહીન અને દૂષિત આહારના કારણે પશુધનમાં ગંભીર રોગો ફેલાવવાનું જોખમ રહેતું હતું, જેનાથી પશુપાલકોને મોટું આર્થિક નુકસાન વેઠવું પડતું હતું. આ કાયદાના પ્રભાવશાળી અમલીકરણથી રાજ્યના કરોડો પશુધનના આરોગ્યનું રક્ષણ થશે અને તેમના ઉત્પાદકતા આયુષ્યમાં પણ નોંધપાત્ર સુધારો જોવા મળશે.
કાયદાની જોગવાઈઓ અનુસાર, હવે પશુ આહાર, મરઘાં-ચણ તેમજ ખનિજ મિશ્રણના ઉત્પાદન એકમો, ગોદામોમાં સંગ્રહ, પરિવહન અને વેચાણની સમગ્ર પ્રક્રિયા પર સરકારનું કડક મોનિટરિંગ રહેશે. નિયત ધોરણોનું ઉલ્લંઘન કરનાર, અપ્રમાણસર ભેળસેળ કરનાર કે અખાદ્ય સામગ્રીનું વેચાણ કરનાર અસામાજિક તત્વો અને વેપારીઓ સામે કડક દંડાત્મક અને કાનૂની કાર્યવાહી હાથ ધરવામાં આવશે, જેથી બજારમાં માત્ર પ્રમાણિત ઉત્પાદનો જ ઉપલબ્ધ રહે.
![[સરકારી કર્મચારીઓ માટે તમિલનાડુ સરકારનો કડક આદેશ, વ્યક્તિગત રજૂઆતો બાબતે ચેતવણી]](/media/news_images/main_img_20261024_185516_1f3606.jpg)
