આસો સુદ એકમથી આદ્યશક્તિ જગતજનનીની આરાધનાના પરમ પાવન પર્વ આસો મહા નવરાત્રીનો ભક્તિભાવપૂર્વક પ્રારંભ થઈ રહ્યો છે. ધાર્મિક માન્યતાઓ અને જ્યોતિષશાસ્ત્રના દૃષ્ટિકોણ મુજબ આ વર્ષે માતાજીનું આગમન ગજ એટલે કે હાથી પર થઈ રહ્યું છે, જેને દેશ અને ભક્તો માટે સુખ, શાંતિ તેમજ અખૂટ સમૃદ્ધિ લાવનારું અત્યંત શુભ સંકેત માનવામાં આવે છે. આ વખતે નવરાત્રી દરમિયાન બે સાતમ તિથિ હોવા છતાં, પંચાંગની ગણતરી મુજબ નોમના દિવસે જ વિજયાદશમી એટલે કે દશેરા આવતી હોવાથી નવેય નોરતા સંપૂર્ણ રહેશે. આ પવિત્ર અવસરે પ્રથમ દિવસે આખો દિવસ માટીનો ગરબો ખરીદવો તેમજ વિધિપૂર્વક ઘટ સ્થાપના કરવી શ્રેષ્ઠ ગણાશે.
નવરાત્રીના પ્રથમ દિવસે ઘટ સ્થાપના અને ગરબા સ્થાપના માટે શાસ્ત્રોક્ત ચોઘડિયા અનુસાર અનેક શુભ મુહૂર્તો પ્રાપ્ત થઈ રહ્યા છે. દિવસ દરમિયાન સવારે ૮:૧૦ થી ૯:૩૮ ચલ, ૯:૩૮ થી ૧૧:૦૬ લાભ તેમજ ૧૧:૦૬ થી ૧૨:૩૩ અમૃત ચોઘડિયું રહેશે. આ ઉપરાંત બપોરે ૧૨:૧૦ થી ૧૨:૫૭ સુધીનો સમય સર્વશ્રેષ્ઠ અભિજિત મુહૂર્ત રહેશે, જેમાં ઘટ સ્થાપના કરવી અતિ ઉત્તમ ફળદાયી માનવામાં આવે છે. બપોરે ૨:૦૧ થી ૩:૩૦ શુભ ચોઘડિયું રહેશે. જે ભક્તો સાંજના સમયે પૂજન કરવા માંગતા હોય તેમના માટે સાંજે ૬:૨૪ થી રાત્રે ૯:૧૮ સુધી પ્રદોષ કાળ રહેશે. રાત્રિના ચોઘડિયામાં સાંજે ૬:૨૪ થી ૭:૫૭ શુભ અને ૭:૫૭ થી ૯:૨૯ અમૃત ચોઘડિયામાં પણ માતાજીની સ્થાપના થઈ શકશે.
આ નવ દિવસીય મહાપર્વ દરમિયાન મા દુર્ગાના નવ સ્વરૂપોનું વિશિષ્ટ પૂજન અને નૈવેદ્ય અર્પણ કરવાનું અનેરું મહત્વ રહેલું છે. પ્રથમ નોરતે મા શૈલપુત્રીને શુદ્ધ ઘીનો પ્રસાદ, બીજા નોરતે મા બ્રહ્મચારિણીને સાકર કે પંચામૃત, ત્રીજા નોરતે મા ચંદ્રઘંટાને દૂધની ખીર, ચોથા નોરતે મા કુષ્માંડાને માલપુઆ અને પાંચમા નોરતે મા સ્કંદમાતાને કેળાનો ભોગ ધરાવવામાં આવશે. જ્યારે છઠ્ઠા નોરતે મા કાત્યાયનીને મધ, સાતમા નોરતે મા કાલરાત્રિને ગોળ, આઠમા નોરતે મા મહાગૌરીને નાળિયેર તેમજ અંતિમ નોરતે મા સિદ્ધિદાત્રીને કાળા ચણા, હલવો અને પૂરીનો પ્રસાદ ચડાવવાથી માતાજી પ્રસન્ન થઈ ભક્તોની મનોકામના પૂર્ણ કરે છે.
