વિશ્વપ્રસિદ્ધ મેગેઝિન 'પ્લેબોય'ના સ્થાપક સ્વર્ગસ્થ હ્યુ હેફનરની પત્ની ક્રિસ્ટલ હેરિસે પોતાના ભૂતકાળ અને વૈવાહિક જીવન અંગે ચોંકાવનારા ખુલાસા કર્યા છે. માત્ર ૨૬ વર્ષની વયે પોતાના કરતાં ખૂબ મોટી ઉંમરના હેફનર સાથે લગ્ન કરનાર ક્રિસ્ટલે હવે વર્ષો બાદ કબૂલાત કરી છે કે તે નિર્ણય તેના જીવનની સૌથી મોટી ભૂલ હતી અને તેને આ લગ્ન માટે ભારે અફસોસ થઈ રહ્યો છે. આ પૃષ્ઠભૂમિ વચ્ચે તેણે હોલીવુડ અભિનેત્રી જેસિકા બીલને પ્લેબોય આધારિત ફિલ્મ 'પ્લેમેટ્સ'ના પ્રોજેક્ટ પર પુનર્વિચાર કરવા એક સંદેશ પાઠવીને ગંભીર ચેતવણી આપી છે.
ક્રિસ્ટલ હેરિસે ખુલાસો કર્યો હતો કે પ્લેબોય હવેલીની બહારથી જે ઝાકઝમાળ અને રંગીન દુનિયા દેખાતી હતી, તેની પાછળનું કડવું સત્ય અત્યંત દર્દનાક હતું. તેણે સ્પષ્ટ કર્યું કે તે સમયગાળા દરમિયાન તેણે ગંભીર માનસિક આઘાત અને મુશ્કેલ પરિસ્થિતિઓનો સામનો કરવો પડ્યો હતો. હેફનર સાથે સંકળાયેલી મહિલાઓએ જે યાતના અને શોષણ સહન કર્યું હતું, તે આજે પણ તેમના જીવનમાં ઊંડા ઘા સમાન છે. ભપકાદાર દેખાતી આ દુનિયાની પાછળ મહિલાઓના આત્મસન્માન અને માનસિક સ્વાસ્થ્યને ભારે નુકસાન પહોંચાડવામાં આવતું હતું.
અભિનેત્રી જેસિકા બીલને સંબોધતા ક્રિસ્ટલે ભારપૂર્વક જણાવ્યું કે, આ વિષય પર કોઈપણ સિનેમા કે પ્રોજેક્ટ બનાવતા પહેલા પ્લેબોયની વાસ્તવિકતા ભોગવી ચૂકેલી મહિલાઓના વાસ્તવિક અનુભવોને સાંભળવા અનિવાર્ય છે. ભૂતકાળના શોષણકારી વાતાવરણનું પડદા પર મહિમામંડન કરવું કે તેને માત્ર મનોરંજન તરીકે રજૂ કરવું યોગ્ય નથી. તેણે અપીલ કરી કે ફિલ્મ નિર્માણ દરમિયાન આ ભ્રામક દુનિયાની અંદર થયેલા અન્યાય અને મહિલાઓની માનસિક પીડાની ગંભીરતાને નજરઅંદાજ ન કરવી જોઈએ.
નોંધનીય છે કે હ્યુ હેફનરના નિધન બાદ તેની સાથે રહેલી અનેક મોડેલ્સ અને પત્નીઓએ હવેલીના બંધ દરવાજા પાછળના રહસ્યો ખુલ્લા પાડ્યા છે. ક્રિસ્ટલે પોતાના જીવનના આ કડવા પ્રકરણમાંથી બહાર આવીને હવે અન્ય મહિલાઓને જાગૃત કરવાનું વલણ અપનાવ્યું છે. તેણે વ્યક્ત કર્યું કે ભૂતકાળની ભૂલો સ્વીકારીને સાચો અવાજ ઉઠાવવો જરૂરી છે, જેથી ભવિષ્યમાં કોઈ અન્ય યુવતી આ પ્રકારના ઝાકઝમાળની ભ્રામક જાળમાં ન ફસાય.
