ગાંધીનગર ખાતે મુસ્લિમ એજ્યુકેશન એન્ડ વેલફેર એસોસિએશન (મેવા) દ્વારા તેજસ્વી વિદ્યાર્થીઓના સન્માન અર્થે એક ભવ્ય વાર્ષિક ઇનામ વિતરણ સમારોહનું આયોજન કરવામાં આવ્યું હતું. આ ગૌરવપૂર્ણ કાર્યક્રમમાં ધોરણ-૧૦, ધોરણ-૧૨ તેમજ ઉચ્ચ શિક્ષણના વિવિધ પ્રવાહોમાં ઉત્કૃષ્ટ પરિણામ મેળવી ઝળહળતી સફળતા હાંસલ કરનારા પ્રતિભાશાળી વિદ્યાર્થીઓને શિલ્ડ, પ્રમાણપત્ર અને ઇનામો અર્પણ કરીને પ્રોત્સાહિત કરવામાં આવ્યા હતા. આ સમારોહનો મુખ્ય ઉદ્દેશ્ય સમાજના યુવાધનને શિક્ષણ ક્ષેત્રે નવી ઊંચાઈઓ સર કરવા અને ઉચ્ચ કારકિર્દી ઘડવા માટે યોગ્ય વાતાવરણ પૂરું પાડવાનો હતો.
આ પ્રેરણાદાયી સમારોહ સિદ્ધપુર સરકારી ડેન્ટલ કોલેજના પ્રોફેસર શ્રી બિલાલ શેઠના અધ્યક્ષ સ્થાને સંપન્ન થયો હતો. આ પ્રસંગે જાણીતા મનોચિકિત્સક ડૉક્ટર મુકીમ સૈયદ, ગુજરાત હાઇકોર્ટના એડવોકેટ શ્રી સોહેલ તિરમિઝી, પ્રેરક વક્તા શ્રી ઇરફાન મોગલ તેમજ આસિસ્ટન્ટ પ્રોફેસર ડૉક્ટર સોફિયા વોહરા મુખ્ય અતિથિ વિશેષ તરીકે ઉપસ્થિત રહ્યા હતા. મંચસ્થ મહાનુભાવોએ વિદ્યાર્થીઓ અને વાલીઓને કારકિર્દીલક્ષી માર્ગદર્શન આપતાં જણાવ્યું હતું કે વર્તમાન સમય ટેકનોલોજીનો છે. ખાસ કરીને આજના આર્ટિફિશિયલ ઇન્ટેલિજન્સના ક્રાંતિકારી યુગ સાથે કદમ મિલાવવું અત્યંત અનિવાર્ય છે. વક્તાઓએ વિદ્યાર્થીઓને આગામી પાંચ વર્ષમાં કયા ક્ષેત્રની માંગ રહેવાની છે તેનો ઊંડાણપૂર્વક અભ્યાસ કરીને પોતાની રુચિ મુજબ સચોટ દિશા પસંદ કરવા આહવાન કર્યું હતું.
સમગ્ર કાર્યક્રમનું સુચારુ સંચાલન સંસ્થાના સેક્રેટરી યુનુસસલીમ સૈયદ દ્વારા કરવામાં આવ્યું હતું. પ્રારંભમાં સંસ્થાના પ્રમુખ ઉસમાનખાન રાઠોડે ઉપસ્થિત તમામ મહાનુભાવો, તેજસ્વી વિદ્યાર્થીઓ અને વાલીઓનું ભાવભર્યું સ્વાગત કરી સંસ્થાની શૈક્ષણિક પ્રવૃત્તિઓનો પરિચય આપ્યો હતો. કાર્યક્રમને સફળ બનાવવા માટે સંસ્થાના અહેમદઅલી સૈયદ, મોઈનભાઈ સૈયદ, જીલાનીમિયાં સૈયદ, મુસ્તુફા શેખ, રોશનશા ફકીર, રફીક મનસુરી, શહેનાઝબેન અનસારી, રજાકભાઈ પઢિયાર અને ઈરશાદઅલી સૈયદ સહિતના સભ્યોએ ભારે જહેમત ઉઠાવી હતી. આ સન્માન સમારોહથી વિદ્યાર્થીઓમાં નવો ઉત્સાહ અને આત્મવિશ્વાસ જોવા મળ્યો હતો.
