હબલીમાં એક પત્રકાર પરિષદને સંબોધતા કેન્દ્રીય મંત્રી પ્રહલાદ જોશીએ કોંગ્રેસ પાર્ટી પર આકરા પ્રહારો કર્યા હતા. તેમણે કર્નાટકના મંત્રી રિઝવાન અરશદના એ દાવાને ફગાવી દીધો હતો જેમાં પેટ્રોલ માર્કેટિંગ કંપનીઓ દ્વારા પેટ્રોલમાં ૨૦ ટકાથી વધુ ઇથેનોલ મિશ્રણ કરવામાં આવતું હોવાનું જણાવાયું હતું. જોશીએ સ્પષ્ટ કર્યું કે આ પ્રકારના આક્ષેપો માત્ર અલ્પસંખ્યકોને અને રાહુલ ગાંધીને ખુશ કરવા માટેના રાજકીય સ્ટંટ સિવાય કઈ જ નથી. તેમણે ઉમેર્યું કે દેશની જનતા કોંગ્રેસની આ દોષી અને રાજકીય સ્વાર્થવાળી નીતિને સારી રીતે સમજે છે અને અગાઉ પણ તેના આવા તમામ પ્રયાસોને નકારી ચૂકી છે.
ઇથેનોલ મિશ્રણ પાછળના આર્થિક અને વ્યવસાયિક તર્કને સમજાવતા મંત્રીએ જણાવ્યું કે આ પહેલ દેશના ખેડૂતોને આર્થિક રીતે સશક્ત બનાવવા અને વિદેશી ક્રૂડ ઓઇલ પરની ભારતની નિર્ભરતા ઘટાડવા માટે હાથ ધરવામાં આવી છે. મોંઘા ક્રૂડ ઓઇલ સામે મકાઈમાંથી બનતા ઇથેનોલના કિંમત અને ઉપયોગના વ્યવસાયિક સમીકરણો જોતા કોંગ્રેસના આક્ષેપોમાં કોઈ તથ્ય નથી. વધુમાં, પેટ્રો અને ડિઝલની ગુણવત્તા ચકાસવા માટે વિશેષ સાધનો અને માન્યતા પ્રાપ્ત પ્રયોગશાળાઓની જરૂર પડે છે, જેનો પાયો ખુદ ૨૦૦૫માં યુપીએ સરકારી કાળ દરમિયાન 'પેટ્રોલ એન્ડ ડિઝલ ઓર્ડર' દ્વારા નાખવામાં આવ્યો હતો તેમ તેમણે યાદ અપાવ્યું હતું.
આ અગાઉ કર્નાટક સરકારે સાત જિલ્લાઓમાંથી એકત્રિત કરેલા પેટ્રોલના સેમ્પલમાં ૨૦ ટકાથી વધુ ઇથેનોલ હોવાનો દાવો કર્યો હતો, જેનાથી વાહનોના એન્જિનને નુકસાન થવાની ભીતિ વ્યક્ત કરવામાં આવી હતી. જોકે, ઓઇલ માર્કેટિંગ કંપનીઓએ આ દાવાઓને સદંતર ફગાવી દીધા છે. પ્રહલાદ જોશીએ રાહુલ ગાંધી પર પ્રહાર કરતા કહ્યું કે અગાઉ ઈવીએમ, ઘૂસણખોરો અને ચૂંટણી કમિશનર જેવા મુદ્દાઓ પર નિશાન સાધ્યા બાદ હવે કોંગ્રેસ એક 'નકામા નેતાના નેતૃત્વમાં નકામું આંદોલન' ચલાવવાનો પ્રયાસ કરી રહી છે, જેને જનતા દ્વારા ક્યારેય સ્વીકારવામાં આવશે નહીં.
