અમેરિકી યુદ્ધ વિભાગના સચિવ પીટ હેગસેથે મે મહિના બાદ પોતાની પ્રથમ મીડિયા બ્રિફિંગમાં મહાભિયોગની કાર્યવાહીને એક રાજકીય તમાશો અને અહંકારથી પ્રેરેલું નાટક ગણાવ્યું હતું. રિપબ્લિકન સાંસદ થોમસ મૈસી દ્વારા ઇરાન સાથેના યુદ્ધના સંચાલનને લઈને હેગસેથ સામે મહાભિયોગનો પ્રસ્તાવ મૂકવામાં આવ્યો છે. આ બાબતે આક્રમક મુદ્રા અપનાવતા હેગસેથે જણાવ્યું હતું કે અમેરિકી ઇતિહાસમાં ક્યારેય કોઈ યુદ્ધ સચિવ પર કાયદેસરના લશ્કરી ઓપરેશનો ચલાવવા બદલ મહાભિયોગ ચલાવવામાં આવ્યો નથી. તેમણે સ્પષ્ટપણે જણાવ્યું કે આ પ્રસ્તાવ નીતિગત મતભેદો ધરાવતા પરાજિત સાંસદ દ્વારા માત્ર અંગત રોષ અને અહંકાર પોષવા માટે લાવવામાં આવ્યો છે, જેને દેશનો દરેક નાગરિક જાણે છે.
ઇરાન સાથેના વિવાદાસ્પદ યુદ્ધને યોગ્ય ઠેરવતા હેગસેથે દાવો કર્યો હતો કે ઇતિહાસ આ યુદ્ધને અત્યારની પરંપરાગત માન્યતાઓ કરતા તદ્દન અલગ દ્રષ્ટિએ જોશે. તેમણે ઉમેર્યું હતું કે અમેરિકાએ આ યુદ્ધ શરૂ નથી કર્યું પરંતુ ઇરાને ૪૭ વર્ષ પહેલાં તેની શરૂઆત કરી હતી. મહાભિયોગના આ પ્રસ્તાવમાં ઇરાન ઉપરાંત યેમેનમાં હૂતી વિદ્રોહીઓ અને વેનેઝુએલા સામેની સૈન્ય કાર્યવાહીનો પણ ઉલ્લેખ કરવામાં આવ્યો છે, જેના પર હેગસેથે ગર્વ અનુભવતા કહ્યું કે તેઓ આ દરેક ઓપરેશનની પાછળ મજબૂતાઈથી ઊભા છે અને જો જરૂર પડે તો આવતીકાલે પણ તે ફરીથી કરી શકે છે.
મહાભિયોગની આ સમગ્ર કવાયતને સૈનિકો પરના હુમલા સમાન ગણાવતા હેગસેથે ચેતવણી આપી હતી કે આવા નિર્ણયો દેશની રક્ષા માટે શહીદ કે સેવારત થનારા સૈનિકોના મનોબળને તોડે છે. તેમણે સ્પષ્ટ શબ્દોમાં કહ્યું કે સૈનિકોની રાષ્ટ્રસેવા ક્યારેય અપરાધ ન હોઈ શકે અને તેઓ દેશના અસલી નાયકો છે. મધ્યાવધિ ચૂંટણીઓમાં રિપબ્લિકન પાર્ટીને મળેલી હાર અને રાષ્ટ્રપતિ ડોનાલ્ડ ટ્રમ્પના વિરોધીઓની રાજકીય ચાલ વચ્ચે હેગસેથનું આ નિવેદન વોશિંગ્ટનમાં રાજકીય ગરમાવો વધારી રહ્યું છે, અને હવે આગામી સમયમાં આ મહાભિયોગના પ્રસ્તાવ પર શું નિર્ણય આવે છે તેના પર સૌની નજર ટકેલી છે.
