ઈન્ડિયન પ્રીમિયર લીગ (IPL) ની આગામી સિઝન પહેલા ફ્રેન્ચાઈઝીઓ દ્વારા રણનીતિ ઘડવાનું શરૂ થઈ ગયું છે, જેના ભાગરૂપે ચેન્નાઈ સુપર કિંગ્સ (CSK) અને સનરાઇઝર્સ હૈદરાબાદ (SRH) વચ્ચે ચાર ખેલાડીઓની અદલાબદલીનો મોટો સોદો સંપન્ન થયો છે. આ ટ્રેડિંગ હેઠળ ઈંગ્લેન્ડના વિસ્ફોટક ઓલરાઉન્ડર લિયામ લિવિંગ્સ્ટન અને ઓસ્ટ્રેલિયાના યુવા ઓલરાઉન્ડર જેક એડવર્ડ્સ પાંચ વખતની ચેમ્પિયન એવી CSK ટીમમાં જોડાયા છે. રસપ્રદ વાત એ છે કે લિવિંગ્સ્ટનને તેની મૂળ કિંમત 13 કરોડ રૂપિયાથી ઘટાડીને 6 કરોડ રૂપિયાની વિશેષ ફી પર ચેન્નાઈ દ્વારા સામેલ કરવામાં આવ્યો છે, જ્યારે જેક એડવર્ડ્સ તેની અગાઉની 3 કરોડ રૂપિયાની ફી પર જ CSKનો હિસ્સો બન્યો છે.
બીજી તરફ, આ ડીલના બદલામાં સનરાઇઝર્સ હૈદરાબાદ (SRH) એ પોતાની બોલિંગ આક્રમણને મજબૂત કરવા માટે ડાબા હાથના અનુભવી ઝડપી બોલર ખલીલ અહેમદ અને ઓસ્ટ્રેલિયન પેસર નાથન એલિસને પોતાની ટીમમાં સામેલ કર્યા છે. ખલીલ અહેમદ અગાઉ પણ 2018 થી 2021 દરમિયાન SRH માટે રમી ચૂક્યો છે અને તે ફરી એકવાર પોતાની જૂની ફ્રેન્ચાઈઝીમાં પરત ફર્યો છે, જેને 4.8 કરોડ રૂપિયાની ફી પર ટ્રેડ કરવામાં આવ્યો છે. જ્યારે ડેથ ઓવર્સમાં પોતાની ઘાતક બોલિંગ અને વેરીએશન્સ માટે જાણીતા નાથન એલિસને હૈદરાબાદે તેની 2 કરોડ રૂપિયાની મૂળ ફી પર જ ખરીદી લીધો છે, જેનાથી ટીમની પેસ એટેક લાઇન વધુ સબળ બનશે.
આગામી સમયમાં આઈપીએલ જગતમાં આવા વધુ મોટા ટ્રેડ અને ફેરફારો જોવા મળી શકે છે કારણ કે ખેલાડીઓને રિટેઈન કરવાની અંતિમ તારીખ 17 નવેમ્બર સુધી લંબાવવામાં આવી છે. આ તમામ ગતિવિધિઓ વચ્ચે આગામી 16 ડિસેમ્બરે ગોવા ખાતે આઈપીએલની મિની હરાજી યોજાવાની છે, જે અગાઉ ક્રિકેટ વર્તુળોમાં એવી પણ ચર્ચાઓ જોરશોરથી ચાલી રહી છે કે સ્ટાર ઓલરાઉન્ડર હાર્દિક પંડ્યા મુંબઈ ઇન્ડિયન્સ છોડીને અર્શદીપ સિંહના બદલામાં પંજાબ કિંગ્સમાં જોડાઈ શકે છે. ફ્રેન્ચાઈઝીઓની આ વ્યૂહાત્મક અદલાબદલીઓ આગામી સિઝનને વધુ રોમાંચક બનાવશે તે નક્કી છે.