પંજાબના પૂર્વ મુખ્યમંત્રી બેઅંત સિંહની ઓગસ્ટ 1995માં થયેલી હત્યા કેસમાં આજીવન કેદની સજા ભોગવી રહેલા બાબબર ખાલસાના આતંકવાદી જગતાર સિંહ હાવરાને દિલ્હીની તિહાર જેલમાંથી પંજાબની કોઈપણ જેલમાં તબદીલ કરવાના મામલે સુપ્રીમ કોર્ટમાં મહત્વની સુનાવણી હાથ ધરવામાં આવી હતી. ઇન્ટેલિજન્સ બ્યુરો (IB) એ સર્વોચ્ચ અદાલતમાં પોતાનો રિપોર્ટ રજૂ કરતા સ્પષ્ટપણે જણાવ્યું હતું કે હાવરાનું પંજાબ સ્થળાંતર રાજ્યની આગામી ચૂંટણીઓ અને કાયદો-વ્યવસ્થાની સ્થિતિને ડહોળી શકે છે. ન્યાયાધીશ એમ.એમ. સુંદરશ અને પીએમ વરાલેની બેંચ સમક્ષ એજન્સીના આ રિપોર્ટને અત્યંત ગંભીર ગણાવવામાં આવ્યો છે, જેના પગલે હાવરાના વકીલે જો ચૂંટણી મુખ્ય ચિંતા હોય તો આ મામલો ત્રણ મહિના પછી હાથ પર લેવાની રજૂઆત કરી હતી.
દિલ્હી સરકાર વતી હાજર રહેલા એડિશનલ સોલિસિટર જનરલ એશ્વર્યા ભાટીએ કોર્ટમાં જણાવ્યું હતું કે હાવરા અત્યંત જોખમી (હાઇ-રિસ્ક) કેદીની શ્રેણીમાં આવે છે અને ભૂતકાળમાં તે ચંડીગઢ જેલમાં સુરંગ ખોદીને ફરાર થઈ ચુક્યો છે. કેન્દ્રીય ગૃહ મંત્રાલયની માર્ગદર્શિકા અને પંજાબ સરકારના સોગંદનામાનો હવાલો આપતા એસજી ભાટીએ દલીલ કરી હતી કે તેને પંજાબ ખસેડવાથી તેના નાસી છૂટવાની શક્યતાઓ વધી જાય છે અને રાજ્યમાં સુરક્ષાનું જોખમ ઊભું થઈ શકે છે. બીજી તરફ, હાવરાના વકીલે દલીલ કરી હતી કે હાવરા સામે રાષ્ટ્રીય રાજધાનીમાં કોઈ કેસ પેન્ડિંગ નથી અને જેલના છેલ્લા ૧૯ વર્ષ દરમિયાન તેનું વર્તન ઉત્તમ રહ્યું છે, ઉપરાંત તેના પરિવારના સભ્યો પણ પંજાબમાં જ રહે છે તેથી તેને મૂળ રાજ્યની જેલમાં મોકલવો જોઈએ.
વર્ષ 1995માં ચંડીગઢ સચિવાલયના પ્રવેશદ્વાર પર થયેલા બોમ્બ વિસ્ફોટમાં તત્કાલીન મુખ્યમંત્રી બેઅંત સિંહ સહિત ૧૭ લોકોના મોત થયા હતા, જેમાં ટ્રાયલ કોર્ટે માર્ચ 2007માં હાવરાને ફાંસીની સજા ફટકારી હતી. જોકે, ઓક્ટોબર 2010માં પંજાબ અને હરિયાણા હાઈકોર્ટે તેની ફાંસીની સજાને આજીવન કેદમાં ફેરવી દીધી હતી અને આજીવન જેલમાં જ રાખવાનો આદેશ આપ્યો હતો. જાન્યુઆરી 2004માં બુડૈલ જેલમાંથી ૧૦૦ ફૂટ લાંબી સુરંગ ખોદીને નાસી છૂટવાના કુખ્યાત પ્રકરણમાં સામેલ રહેલા હાવરાની પિટિશન અને સરકારના વિરોધને ધ્યાનમાં રાખીને સુપ્રીમ કોર્ટે આ મામલાની આગામી સુનાવણી આવતા વર્ષના ફેબ્રુઆરી મહિના સુધી મુલતવી રાખી છે.