જર્મનીમાં યુવા વર્ગમાં પ્રવર્તતી અસંતોષની જ્વાળા હવે ખુલ્લેઆમ હિંસા અને અરાજકતામાં પરિવર્તિત થઈ રહી છે, જેનું તાજું અને ભયાનક ઉદાહરણ ફ્રેન્કફર્ટ શહેરમાં જોવા મળ્યું છે. તાજેતરમાં Gen Z (જેન ઝેડ) પેઢીના યુવાનો દ્વારા વિવિધ મુદ્દાઓને લઈને એક વિરોધ પ્રદર્શનનું આયોજન કરવામાં આવ્યું હતું. શરૂઆતમાં શાંતિપૂર્ણ જણાતા આ આંદોલને ટૂંક સમયમાં જ ઉગ્ર સ્વરૂપ ધારણ કરી લીધું હતું. પ્રદર્શનકારીઓમાંથી કેટલાક અસામાજિક તત્વોએ કાયદો અને વ્યવસ્થાને નેવે મૂકીને પોલીસકર્મીઓ પર હુમલા કરવાનું શરૂ કરી દીધું હતું અને રસ્તાઓ પર ભારે અવ્યવસ્થિત માહોલ ઉભો કર્યો હતો.
આ હિંસક પ્રદર્શનોની સૌથી વરવી બાજુ ફ્રેન્કફર્ટના મુખ્યબજારો અને શોપિંગ વિસ્તારોમાં જોવા મળી હતી, જ્યાં ઉશ્કેરાયેલા તોફાનીઓની ભીડે ખુલ્લેઆમ લૂંટફાટ આદરી હતી. પ્રદર્શનની આડમાં અસંખ્ય બદમાશોએ મુખ્ય માર્ગો પર આવેલી પ્રતિષ્ઠિત દુકાનો અને સ્ટોર્સના કાચ તોડીને અંદર પ્રવેશ કર્યો હતો અને કિંમતી સામાન તેમજ રોકડની મોટાપાયે લૂંટ ચલાવી હતી. દિવસના અજવાળામાં જ બનેલી આ ઘટનાઓને કારણે વેપારી વર્ગમાં ભારે ફફડાટ વ્યાપી ગયો છે અને વ્યાપારી સંકુલોને ભારે આર્થિક નુકસાન સહન કરવાનો વારો આવ્યો છે પરિસ્થિતિ એટલી વણસી ગઈ કે વેપારીઓએ પોતાની સુરક્ષા માટે તાત્કાલિક ધોરણે પોતાના ધંધાકીય એકમો બંધ કરી દીધા હતા.
ઘટનાની ગંભીરતાને ધ્યાનમાં રાખીને જર્મન પોલીસે તાત્કાલિક મોટી સંખ્યામાં સુરક્ષા દળો અને દંગા નિયંત્રણ પોલીસને ઘટનાસ્થળે મોકલીને પરિસ્થિતિ પર કાબૂ મેળવવાનો પ્રયાસ કર્યો હતો. પોલીસે અરાજકતા ફેલાવનારા અને લૂંટફાટમાં સંડોવાયેલા કેટલાક મુખ્ય તોફાનીઓની ધરપકડ પણ કરી છે, જ્યારે બાકીના ઉપદ્રવીઓને શોધી કાઢવા માટે સીસીટીવી ફૂટેજની મદદ લેવામાં આવી રહી છે. સ્થાનિક વહીવટી તંત્ર અને સરકાર દ્વારા આ ઘટનાની ગંભીર નોંધ લેવામાં આવી છે અને આગામી દિવસોમાં શહેરમાં વધુ કડક સુરક્ષા વ્યવસ્થા ગોઠવવાની જાહેરાત કરવામાં આવી છે જેથી ભવિષ્યમાં આવી અસમાજિક ઘટનાઓનું પુનરાવર્તન ન થાય.