ચેન્નાઈના વ્યસ્ત વેલાચેરી મેઈન રોડ પર ફીનિક્સ માર્કેટસિટી નજીક અચાનક રસ્તો બેસી જવાની ઘટના સામે આવી છે. દિવાળીના તહેવારની ખરીદી માટે નીકળેલી જનમેદની વચ્ચે રસ્તો ધસી પડતાં ગિન્ડી અને વેલાચેરી વચ્ચે અવરજવર કરતા વાહનચાલકો ભારે ટ્રાફિકજામમાં ફસાઈ ગયા હતા. મેટ્રોવોટરના અધિકારીઓના જણાવ્યા અનુસાર, સવારે આ ઘટનાની માહિતી મળ્યા બાદ તપાસ કરતાં જણાયું હતું કે, ૧૫૦ એમએમની જૂની મુખ્ય પાઇપલાઇનમાં ધીમા લીકેજને કારણે રસ્તાની સપાટી નબળી પડી ગઈ હતી અને આ ગંભીર અકસ્માત સર્જાયો હતો.
તહેવારના માહોલ વચ્ચે રસ્તો બંધ થવાથી અને સુરક્ષા માટે બેરિકેડ્સ લગાવવાથી ટ્રાફિકની મોટી સમસ્યા ઊભી થઈ હતી. માલની મુલાકાતે અથવા કામ અર્થે નીકળેલા નાગરિકો કલાકો સુધી ટ્રાફિકમાં ફસાયા હતા. ક્રોમપેટના રહેવાસી જી. સુનિલે સોશિયલ મીડિયા અને વાતચીતમાં જણાવ્યું હતું કે સામાન્ય દિવસોમાં જે અંતર કાપવામાં દસ મિનિટ થાય છે, તે માટે આજે દોઢ કલાક સુધી ગાડીમાં જ બેસી રહેવું પડ્યું હતું અને કારમાં બેસીને જ ઓનલાઈન મીટિંગ Attend કરવી પડી હતી. સોશિયલ મીડિયા પર પણ લોકોએ અન્ય વાહનચાલકોને આ રસ્તે ન જવા માટે ચેતવણીઓ આપી હતી.
ઘટનાની ગંભીરતાને ધ્યાનમાં રાખીને મેટ્રોવોટર તંત્ર તાત્કાલિક હરકતમાં આવ્યું હતું અને રવિવાર સાંજ સુધીમાં ૭ મીટર જેટલી ક્ષતિગ્રસ્ત પાઇપલાઇનમાંથી ૪ મીટર ભાગ બદલી નાખવામાં આવ્યો હતો. અધિકારીઓએ બાકીનું કામ પણ ઝડપથી પૂર્ણ કરી લીધું હતું. જોકે, છેલ્લા બે મહિનામાં ઓએમઆર, પેરામ્બુર અને જીએનટી રોડ પર પણ પાઇપલાઇન ફાટવાના કારણે રસ્તા બેસી જવાની આવી અનેક ઘટનાઓ બની છે, જેણે શહેરી માળખાકીય સુવિધાઓ સામે ગંભીર સવાલો ખડા કર્યા છે. મેટ્રોવોટરના એમડી ટી. આનંદે જણાવ્યું હતું કે તંત્ર દ્વારા અત્યંત જૂની અને સંવેદનશીલ ગટર લાઈનોની ઓળખ કરવામાં આવી છે અને આગામી સમયમાં ૧૫ કિલોમીટર લાંબી આવી જૂની લાઈનોને આધુનિક ડક્ટાઇલ આયર્ન (DI) પાઈપોથી બદલવામાં આવશે.