સોશિયલ મીડિયા જાયન્ટ મેટા હવે આર્ટિફિશિયલ ઇન્ટેલિજન્સ (AI) ની દુનિયામાં એક મોટી ક્રાંતિ લાવવા માટે સજ્જ થઈ ગઈ છે. ચાઈનીઝ રોબોટિક્સ કંપની ફૂરિયરના સહયોગથી તૈયાર કરાયેલ 'મેક્સ' નામનું આ હ્યુમેનોઇડ રોબોટ અંદાજે ૪૮ કિલો વજન ધરાવે છે અને તેની ઊંચાઈ પાંચ ફૂટ છે. આ રોબોટના હાથમાં પાંચ આંગળીઓ છે, છાતીમાં સ્પીકર્સ છે અને ચહેરા પર એક સ્ક્રીન આપવામાં આવી છે જે માનવીય હાવભાવ અને અભિવ્યક્તિઓની નકલ કરી શકે છે. Nvidia ના જેટસન થોર્ન પ્લેટફોર્મ પર કામ કરતું આ રોબોટ બોટલ અને રમકડાં જેવી નાની ચીજવસ્તુઓને સહેલાઈથી પકડી શકે છે. મેટાના રોબોટિક્સ ડિવિઝન દ્વારા આ પ્રોટોટાઇપને લોકોની વચ્ચે સુરક્ષિત અને કુદરતી રીતે વર્તે તેવા ખાસ માપદંડો સાથે તૈયાર કરવામાં આવ્યું છે, જે પાંચ મીટર દૂરથી અવાજ ઓળખી શકે છે અને આંખોનો સંપર્ક જાળવી શકે છે.
આ પ્રોજેક્ટ પાછળ મેટાનો મુખ્ય ઉદ્દેશ્ય તેના એઆઈ એજન્ટ 'મ્યુઝ' ને માત્ર ડિજિટલ સ્ક્રીનમાંથી બહાર કાઢીને વાસ્તવિક દુનિયામાં ક્રિયાપ્રતિક્રિયા કરી શકે તેવું ભૌતિક સ્વરૂપ આપવાનો છે. મેટાની ટીમ હાલમાં સપ્ટેમ્બરથી જ આ રોબોટના બીજા અદ્યતન સંસ્કરણ પર કામ કરી રહી છે, જેમાં નવેસરથી ડિઝાઇન કરાયેલ ધડ, વધુ સારી પકડ ધરાવતા હાથ, વિઝ્યુઅલ કન્ટેન્ટ પ્રદર્શિત કરવા માટે પ્રોજેક્ટર અને સીડીઓ ચઢવામાં મદદરૂપ થાય તેવા સેન્સરનો સમાવેશ થાય છે. હાલમાં આ સહયોગ માત્ર આંતરિક સંશોધન અને પ્રયોગો પૂરતો મર્યાદિત છે અને તેને વ્યાપારી ધોરણે વેચવાની કોઈ તાત્કાલિક યોજના નથી, પરંતુ કંપની ભવિષ્યમાં એક ઉત્કૃષ્ટ ઉત્પાદન બજારમાં ઉતારવા માટે ગંભીરતાથી પ્રયાસ કરી રહી છે.
હ્યુમેનોઇડ રોબોટિક્સના આ સ્પર્ધાત્મક ક્ષેત્રમાં ટેસ્લાનું 'ઓપ્ટિમસ', ફિગર અને 1X ટેક્નોલોજીસ જેવી દિગ્ગજ કંપનીઓ પહેલેથી જ આગળ વધી રહી છે, ત્યારે મેટાનું આ ક્ષેત્રે પ્રવેશવું એ ટેકનોલોજી જગતમાં નવા સમીકરણો સર્જશે. ખાસ કરીને અમેરિકા અને ચીન વચ્ચે એઆઈ અને ટેકનોલોજી બાબતે ચાલી રહેલા તણાવ તેમજ નિયમનકારી પડકારો વચ્ચે મેટાની આ ચાઈનીઝ સ્ટાર્ટઅપ સાથેની ભાગીદારી અત્યંત રસપ્રદ બની રહી છે. વોટ્સએપ, ઇન્સ્ટાગ્રામ અને ફેસબુક દ્વારા એઆઈને ઘર-ઘર સુધી પહોંચાડ્યા બાદ, હવે માર્ક ઝકરબર્ગ ડિજિટલ બુદ્ધિમત્તાને વાસ્તવિક શરીર આપીને માનવ જીવન અને ટેકનોલોજી વચ્ચેના સંબંધોને નવો આકાર આપવા માટે પૂરી રીતે તૈયાર દેખાઈ રહ્યા છે.