કર્મચારી ભવિષ્ય નિનિધિ સંગઠન (EPFO) સાથે જોડાયેલા કરોડો કર્મચારીઓ માટે સરકારે એક અત્યંત ઉપયોગી અને સરળ સુવિધાનો પ્રારંભ કર્યો છે. કેન્દ્રીય શ્રમ અને રોજગાર મંત્રી મનસુખ માંડવિયા દ્વારા રવિવારે આ નવી વ્હોટ્સએપ સેવાનું લોન્ચિંગ કરવામાં આવ્યું હતું. આ સેવા શરૂ થવાથી પીએફ સભ્યોએ હવે નાની-મોટી માહિતી માટે કે બેલેન્સ ચેક કરવા માટે કચેરીઓના ધક્કા ખાવા નહીં પડે કે પછી જટિલ ઓનલાઈન પોર્ટલ પર જવું નહીં પડે. માત્ર મોબાઈલના એક ક્લિકથી જ પીએફ ખાતાને લગતી તમામ મહત્વની જાણકારી હવે ઘર બેઠા જ ઉપલબ્ધ બનશે, જેનાથી ખાતાધારકોનો સમય અને શ્રમ બંને બચશે.
આ નવી સેવાનો લાભ લેવા માટે EPFO દ્વારા સત્તાવાર વ્હોટ્સએપ નંબર 8796441800 જાહેર કરવામાં આવ્યો છે. સભ્યોએ સૌથી પહેલા આ નંબર પોતાના ફોનમાં સેવ કરવાનો રહેશે અને ત્યારબાદ વ્હોટ્સએપ પર જઈને માત્ર 'Hi' નો મેસેજ મોકલવાનો રહેશે. મેસેજ મોકલ્યા બાદ યૂઝરે પોતાના યુએએન (UAN) સાથે લિંક કરેલા રજીસ્ટર્ડ મોબાઈલ નંબર દ્વારા વેરિફિકેશનની પ્રક્રિયા પૂર્ણ કરવાની રહેશે. સુરક્ષાના તમામ ધોરણોને ધ્યાનમાં રાખીને તૈયાર કરાયેલી આ પ્રક્રિયા ખૂબ જ સરળ છે, જેથી કોઈપણ સામાન્ય વ્યક્તિ ટેકનોલોજીની મદદથી આસાનીથી પોતાના ખાતાની માહિતી મેળવી શકે છે.
વેરિફિકેશન પ્રક્રિયા સફળતાપૂર્વક પૂર્ણ થયા બાદ યૂઝર્સ વ્હોટ્સએપ ચેટ બોક્સમાં જ પોતાની જરૂરિયાત મુજબના વિકલ્પો પસંદ કરી શકશે. આ સેવાના માધ્યમથી સભ્યો માત્ર પીએફ એકાઉન્ટનું બેલેન્સ જ નહીં, પરંતુ તેમના ખાતાના છેલ્લા પાંચ ટ્રાન્ઝેક્શનની વિગતો પણ જોઈ શકશે. આ ઉપરાંત, જરૂરિયાત મુજબ પીએફ એકાઉન્ટની પાસબુક પણ સીધી જ ડાઉનલોડ કરી શકાશે. ડિજિટલ ઈન્ડિયાની દિશામાં પીએફ સભ્યો માટે આ એક ક્રાંતિકારી પગલું સાબિત થશે, જે પારદર્શિતા વધારવાની સાથે નાગરિકોના જીવનને વધુ સરળ બનાવશે.