લખનૌ ખાતે યોજાયેલી ઉચ્ચ સ્તરીય કોન્ક્લેવમાં ઉત્તર પ્રદેશના આઈટી અને ઈલેક્ટ્રોનિક્સ વિભાગના પ્રિન્સિપલ સેક્રેટરી આલોક કુમાર દ્વારા રાજ્યના ડિજિટલ ટ્રાન્સફોર્મેશન એજન્ડાની વિસ્તૃત રૂપરેખા રજૂ કરવામાં આવી હતી. આ પ્રસંગે તેમણે જાહેરાત કરી હતી કે ઉત્તર પ્રદેશ સરકાર ટૂંક સમયમાં જ સ્ટેટ-લેવલ 'ક્વોન્ટમ મિશન' લોન્ચ કરવા જઈ રહી છે. આ પ્રસ્તાવિત મિશનનો મુખ્ય ઉદ્દેશ્ય ક્વોન્ટમ કમ્પ્યુટિંગ અને ક્વોન્ટમ કોમ્યુનિકેશન જેવા ઉભરતા ક્ષેત્રોમાં રાજ્યની ક્ષમતાઓને મજબૂત કરવાનો છે. આ પહેલથી રાજ્યમાં મોટા પાયે રોકાણો આકર્ષિત થશે, ટેકનોલોજીનો વ્યાપ વધશે તેમજ સ્થાનિક સ્ટાર્ટઅપ્સ અને ઉદ્યોગો માટે રોજગારીની નવી તકોનું સર્જન થશે. આ ઉપરાંત, મુખ્યમંત્રીના સલાહકાર અવનીશ કુમાર અવસ્થીએ રોકાણકારોનો વિશ્વાસ જીતવા માટે કાયદો અને વ્યવસ્થાની સ્થિતિ સર્વોપરી હોવાનું જણાવીને રાજ્યમાં ગુનાખોરી સામે શૂન્ય સહનશીલતાની નીતિ પર ભાર મૂક્યો હતો.
કોન્ક્લેવ દરમિયાન આર્ટિફિશિયલ ઇન્ટેલિજન્સ (AI) ના જવાબદારીપૂર્વક ઉપયોગ અને માનવ સંસાધનની સજ્જતા પર વિશેષ ભાર મૂકવામાં આવ્યો હતો. નાયબ મુખ્ય પ્રધાન બ્રિજેશ પાઠકે સ્વાસ્થ્ય જેવા મહત્વપૂર્ણ ક્ષેત્રોમાં AI ના ઉપયોગને આવકારવાની સાથે ચેતવણી આપી હતી કે નાગરિકોએ ટેકનોલોજી પર અતિશય નિર્ભર ન બનવું જોઈએ. નીતિ આયોગના ડિસ્ટિંગ્વિશ્ડ ફેલો દેબજાની ઘોષે જણાવ્યું હતું કે ભારતની AI ક્ષમતાનો વિકાસ લોકોની ટેકનોલોજી અપનાવવાની તૈયારી પર નિર્ભર રહેશે. બીજી તરફ, નેશનલ સ્ટોક એક્સચેન્જ (NSE) ના એમડી અને સીઈઓ આશિષકુમાર ચૌહાણે જણાવ્યું હતું કે ઉત્તર પ્રદેશના વિકાસમાં કેપિટલ માર્કેટ મહત્વની ભૂમિકા ભજવશે. રાજ્યના રોકાણકારોનો આધાર વધીને ૧.૬ કરોડ થયો છે, અને તાજેતરના મહિનાઓમાં દેશભરમાં સૌથી વધુ નવા રોકાણકારો યુપીમાંથી જોડાયા છે.
રાજ્યના ઔદ્યોગિક વિકાસને વેગ આપવા માટે અગ્રણી ઉદ્યોગપતિઓ અને વૈશ્વિક કંપનીઓએ ઉત્સાહભેર ભાગ લીધો હતો. સિફી ટેક્નોલોજીના ચેરમેન રાજુ વેગસનાએ યુવાનો માટે AI સ્કિલિંગ પર ભાર મૂક્યો હતો, જ્યારે એડવેબ ટેક્નોલોજીના જલજ એ ડાનીએ ગ્રેટર નોઈડામાં 'પ્રગતિ રોબોટિક્સ પાર્ક'ના મંજૂર થવાને ઐતિહાસિક પગલું ગણાવ્યું હતું જે લાખો રોજગારીનું સર્જન કરશે. હિન્દુજા ગ્રુપ અને ઈનમોબી જેવી કંપનીઓએ પણ ઉત્તર પ્રદેશને વન-ટ્રિલિયન ડૉલરની અર્થવ્યવસ્થા બનાવવાના લક્ષ્યમાં સહયોગ આપવાની પ્રતિબદ્ધતા વ્યક્ત કરી હતી. આ કાર્યક્રમમાં આર્જેન્ટિનાના રાજદૂત સહિતના મહાનુભાવોએ ભારતના ૨૦४૭ સુધીના વિકસિત રાષ્ટ્ર બનવાના વિઝનને બિરદાવ્યું હતું.