બેંગલુરુ ખાતે ૭૧મા કર્નાટક રાજ્યોત્સવની ભવ્ય ઉજવણી પ્રસંગે સંબોધન કરતાં મુખ્યમંત્રી ડી.કે. શિવકુમારે રાજ્યના નાગરિકો માટે એક મોટી જાહેરાત કરી હતી. તેમણે જણાવ્યું હતું કે રાજ્ય સરકાર પીળા અને લાલ રંગના પ્રતિકસમા કન્નડ ધ્વજને સત્તાવાર રાજ્ય ધ્વજનો દરજ્જો આપવા માટે સંપૂર્ણપણે પ્રતિબદ્ધ છે. આ પ્રસંગે રાષ્ટ્રીય ધ્વજની સાથે કન્નડ ધ્વજ પણ ફરકાવવામાં આવ્યો હતો. અગાઉ પણ કેબિનેટે આ અંગે નિર્ણય લઈને કેન્દ્ર સરકારને પ્રસ્તાવ મોકલ્યો હતો, પરંતુ ત્યારે તેને માન્યતા મળી ન હતી. હવે રાજ્ય સરકાર આ મુદ્દે આગામી બેગાવી વિધાનસભા સત્રમાં ચર્ચા કરીને તેને કાનૂની સ્વરૂપ આપવા જઈ રહી છે.
મુખ્યમંત્રીએ સ્પષ્ટ કર્યું હતું કે કન્નડ ભાષીઓની સ્વમાનની ભાવનાને ઉજાગર કરવા માટે જેમ રાજ્યનું પોતાનું ગીત છે, તેમ જ સત્તાવાર રાજ્ય ધ્વજ હોવો પણ અત્યંત આવશ્યક છે. આ પીળો અને લાલ ધ્વજ પહેલેથી જ કર્નાટકની જ્ઞાન પરંપરા, સમૃદ્ધ સંસ્કૃતિ, ધાર્મિક એકતા અને શાંતિનું પ્રતિક બની ચૂક્યો છે. આ ધ્વજ ભારતના સંઘીય માળખામાં કર્નાટકની આગવી ઓળખને વધુ મજબૂત બનાવશે. આગામી ૩૦ નવેમ્બરથી બેગાવીના સુવર્ણ સૌધા ખાતે શરૂ થનારા શિયાળુ સત્ર દરમિયાન આ વિષયને કેબિનેટ સમક્ષ મૂકીને સત્તાવાર અને કાનૂની મંજૂરી મેળવવાની દિશામાં નક્કર પગલાં લેવામાં આવશે.
રાજ્યોત્સવના આ પવિત્ર અવસર પર મુખ્યમંત્રીએ વિધાનસભા સૌધા પરિસરમાં માતા ભુવનેશ્વરીની પ્રતિમાને પુષ્પાંજલિ અર્પણ કરી હતી અને શાળાકીય વિદ્યાર્થીઓની ટુકડીઓ દ્વારા યોજાયેલા માર્ચ પાસ્ટની સલામી ઝીલી હતી. આ ભવ્ય સમારોહમાં મંત્રી મધુ બંગરપ્પા, મુખ્ય સચિવ ડૉ. શાલિની રજનીશ સહિતના ઉચ્ચ અધિકારીઓ ઉપસ્થિત રહ્યા હતા. ઉલ્લેખનીય છે કે, ભાષાકીય ધોરણે રાજ્યોના પુનર્ગઠન બાદ ૧૯૫૬માં કન્નડ ભાષી પ્રદેશોને એક છત્ર નીચે એકત્રિત કરવાના દિવસની યાદમાં દર વર્ષે ૧ નવેમ્બરના રોજ કર્નાટક રાજ્યોત્સવ ઉત્સાહભેર ઉજવવામાં આવે છે.