વડાપ્રધાન નરેન્દ્ર મોદીએ મધ્યપ્રદેશ, છત્તીસગઢ, હરિયાણા, કર્ણાટક, કેરળ અને તમિલનાડુના સ્થાપના દિન નિમિત્તે ત્યાંના તમામ રહેવાસીઓને ઉષ્માભરી શુભેચ્છાઓ પાઠવી છે. સોશિયલ મીડિયા પ્લેટફોર્મ 'એક્સ' પર પોતાના સંદેશાઓમાં તેમણે આ રાજ્યોના સમૃદ્ધ વારસા, અનન્ય સંસ્કૃતિ અને વિકાસયાત્રાની પ્રશંસા કરી હતી. વડાપ્રધાને વિશ્વાસ વ્યક્ત કર્યો હતો કે આગામી વર્ષો આ રાજ્યોના નાગરિકો માટે નવી તકો, વધુ સમૃદ્ધિ અને સતત પ્રગતિ લઈને આવશે, જે દેશના સર્વાંગી વિકાસમાં મોટું યોગદાન આપશે.
મધ્યપ્રદેશ અને છત્તીસગઢની પ્રશંસા કરતા વડાપ્રધાને જણાવ્યું કે મધ્યપ્રદેશ કૃષિ, ઉદ્યોગ, પર્યટન અને શિક્ષણ જેવા ક્ષેત્રોમાં સતત નવા સીમાચિહ્નો સર કરી રહ્યું છે, જ્યારે છત્તીસગઢ નકસલવાદને ડામીને વિકાસના પંથે ઝડપથી આગળ વધી રહ્યું છે. હરિયાણા અંગે વાત કરતા તેમણે કહ્યું કે વીરતા અને સમૃદ્ધ સંસ્કૃતિ ધરાવતું આ રાજ્ય કૃષિ અને રમતગમતથી લઈને સંરક્ષણ અને સ્ટાર્ટ-અપ ક્ષેત્રે દેશનું ગૌરવ વધારી રહ્યું છે. અહીંના અન્નદાતાઓ અને ખેલાડીઓ રાષ્ટ્ર નિર્માણમાં મહત્વપૂર્ણ ભૂમિકા ભજવી રહ્યા છે.
દક્ષિણ ભારતના રાજ્યો - કર્ણાટક, કેરળ અને તમિલનાડુનો ઉલ્લેખ કરતા વડાપ્રધાને જણાવ્યું કે આ રાજ્યો તેમની અદ્ભુત સંસ્કૃતિ, પરંપરાઓ અને આધુનિક ક્ષેત્રોની સિદ્ધિઓ માટે જાણીતા છે. કર્ણાટક આઈટી, બાયોટેકનોલોજી અને આર્ટિફિશિયલ ઇન્ટેલિજન્સ જેવા ભવિષ્યવાદી ક્ષેત્રોમાં અગ્રેસર છે. કેરળના લોકોએ સ્વાસ્થ્ય, શિક્ષણ અને વિજ્ઞાન ક્ષેત્રે વૈશ્વિક સ્તરે પ્રશંસા મેળવી છે, તો તમિલનાડુ મેન્યુફેક્ચરિંગ, ઓટોમોબાઈલ, સ્પેસ ટેકનોલોજી અને ઉદ્યોગ સાહસિકતામાં અસાધારણ પ્રદાન આપીને ભારતની પ્રગતિને નવી ગતિ આપી રહ્યું છે.