તેલંગાણાના હૈદરાબાદમાં ગુનાખોરીનો એક અનોખો અને ચોંકાવનારો મામલો સામે આવ્યો છે, જ્યાં એમબીએનો અભ્યાસ કરતો ૨૩ વર્ષીય સોબાન અલી ખાન નામનો યુવક પાર્ક કરેલી લક્ઝરી કારોમાંથી સ્પેર વ્હીલ અને રિમ ચોરી કરવાના રેકેટમાં સંડોવાયેલો હોવાનું બહાર આવ્યું છે. આ મામલાની તપાસનો ધમધમાટ ૨૦ ઓક્ટોબરે રેતિબોવલી વિસ્તારમાં આવેલા ગેલેક્સી એન્ક્લેવ અપાર્ટમેન્ટ બહાર પાર્ક કરેલી મહિન્દ્રા થાર કારમાંથી સ્ટેપની ચોરી થયાની ફરિયાદ નોંધાયા બાદ શરૂ થયો હતો. પોલીસે આ મામલે ગુનો નોંધીને આસપાસના સીસીટીવી ફૂટેજની સઘન તપાસ કરી હતી, જેમાં એક શખ્સ સ્કૂટર પર આવીને ખૂબ જ ચાલાકીથી ટાયર ચોરી કરીને ફરાર થતો નજરે પડ્યો હતો.
આ ચોરની મોડસ ઓપરેન્ડી એટલી ચોક્કસ હતી કે તપાસકર્તાઓ પણ ચોંકી ગયા હતા. આરોપી સોબાન અલી ખાન ખાસ કરીને મહિન્દ્રા થાર જેવી એસયુવી ગાડીઓને જ ટાર્ગેટ બનાવતો હતો અને ટાયર ખોલવા માટેના સાધનો મેળવવા માટે તે પંચર રિપેરિંગની દુકાનોનો ઉપયોગ કરતો હતો. તે પંચરની દુકાને જઈને સાધનો માંગતો અને તેના બદલે ૨૦૦ થી ૩૦૦ રૂપિયાની રિફંડેબલ ડિપોઝિટ જમા કરાવતો હતો. ગાડીનું સ્પેર વ્હીલ અને રિમ સહેલાઈથી કાઢી લીધા બાદ તે તે જ સાધનો પાછા આપીને પોતાની ડિપોઝિટ પરત લઈ લેતો હતો. ઉલ્લેખનીય છે કે આરોપીના પિતા વ્હીલ-અલાઈનમેન્ટની દુકાનમાં કામ કરતા હોવાથી તેને વાહનોના સ્પેર વ્હીલ્સ અને તેની ટેકનિકલ બાબતોની સારી જાણકારી હતી, જેનો ફાયદો તે ચોરી કરવામાં ઉઠાવતો હતો.
પોલીસે સીસીટીવી ફૂટેજના આધારે કડીઓ જોડીને શનિવારે આરોપીની ધરપકડ કરી લીધી છે અને તેની પાસેથી કુલ ૧૫ વ્હીલ કબજે કર્યા છે, જેમાં ૧૨ એકલા મહિન્દ્રા થારના છે જ્યારે બાકીના ફોર્ડ એન્ડેવર અને ઇકોસ્પોર્ટ કારના છે. પૂછપરછ દરમિયાન આરોપીએ હૈદરાબાદના ૧૦ અલગ-અલગ પોલીસ સ્ટેશન હદ વિસ્તારમાં કુલ ૧૧ ચોરીના બનાવોને અંજામ આપ્યો હોવાની કબૂલાત કરી છે. હાલ પોલીસ આરોપીના રિમાન્ડ મેળવીને આ ચોરીઓ ક્યારથી શરૂ થઈ હતી, આ નેટવર્કમાં અન્ય કોઈ સામેલ છે કે નહીં અને ચોરાયેલા ટાયરો ક્યાં વેચવામાં આવતા હતા તે અંગે ઊંડાણપૂર્વક તપાસ કરી રહી છે.
