આંધ્રપ્રદેશના અનંતપુર જિલ્લાના રપ્તાડુ ગામમાં આવેલી જિલ્લા પરિષદ હાઈસ્કૂલ ખાતે શનિવારે સવારે બનેલી આ ઘટનાએ સમગ્ર શિક્ષણ જગતને હચમચાવી દીધું છે. પોલીસ સૂત્રોના જણાવ્યા અનુસાર, આરોપી હેમંત ઉર્ફે ડુમ્મુ પીડિત વિદ્યાર્થિનીનો કાકા થાય છે અને તે લાંબા સમયથી યુવતીની છેડતી કરી રહ્યો હતો. અગાઉ યુવતી દ્વારા તેના પ્રેમ પ્રસ્તાવને સ્પષ્ટપણે ઠુકરાવવામાં આવ્યો હોવાની અદાવતમાં જ તેણે આ ક્રૂર હુમલાનું કાવતરું ઘડ્યું હતું. શનિવારે સવારે આશરે સાડા દસ વાગ્યાના સુમારે જ્યારે વર્ગખંડમાં અભ્યાસ ચાલી રહ્યો હતો અને શિક્ષિકા પણ હાજર હતા, ત્યારે આરોપી અચાનક હાથમાં ચેઈનસો (લાકડા કાપવાનું મશીન) લઈને વર્ગમાં ઘૂસી આવ્યો હતો.
આ ઘટના અંગે પ્રત્યક્ષદર્શી શિક્ષિકા રાજેશ્વરીએ જણાવ્યું હતું કે શાળા પરિસરમાં બાંધકામનું કામ ચાલુ હોવાથી શરૂઆતમાં સ્ટાફને એમ લાગ્યું કે કોઈ મજૂર કે કામદાર સાધન લઈને આવ્યો છે. આરોપીએ વર્ગખંડની બહાર જ મશીન ચાલુ કરી દીધું હતું અને તે સીધો જ વિદ્યાર્થીઓની વચ્ચે પહોંચી ગયો હતો. કોઈ કંઈ સમજે કે પ્રતિક્રિયા આપે તે પહેલા જ તેણે આગળની બેન્ચ પર બેઠેલી પોતાની ભત્રીજી અને તેની સાથી વિદ્યાર્થિની પર જીવલેણ હુમલો કરી દીધો હતો. અચાનક બનેલી આ ઘટનાથી વર્ગખંડમાં અફરાતફરી મચી ગઈ હતી અને ડરના मारे બાળકો અહીં-તહીં દોડવા લાગ્યા હતા. આ હુમલામાં બંને વિદ્યાર્થિનીઓ ગંભીર રીતે ઘાયલ થઈ હતી, જેમાંની એકની હાલત અત્યંત નાજુક હોવાથી તેને તાત્કાલિક સરકારી જનરલ હોસ્પિટલ ખસેડવામાં આવી છે જ્યાં તેની ગંભીર સર્જરી ચાલી રહી છે અને તેને એર એમ્બ્યુલન્સ દ્વારા બેંગ્લોર ખસેડવાની તડામાર તૈયારીઓ ચાલી રહી છે.
આ હૃદયદ્રાવક ઘટના બાદ રાજ્યના શિક્ષણ પ્રધાન નારા લોકેશે તાત્કાલિક કડક પગલાં લેતા જણાવ્યું હતું કે વિદ્યાર્થીઓની માનસિક સ્થિતિ સાચવવી અત્યારે સર્વોચ્ચ પ્રાથમિકતા છે. આઘાતજનક સ્થિતિમાંથી પસાર થઈ રહેલા ધોરણ-૧૦ ના તમામ ૩૨ વિદ્યાર્થીઓ તેમજ ધોરણ ૮, ૯ અને ૧૦ ની વિદ્યાર્થિનીઓના ઘરે જઈને તેમને માનસિક હૂંફ આપવા માટે ૨૦ કાઉન્સિલર્સની ખાસ ટીમ તૈનાત કરવામાં આવી છે, જેઓ બાળકો અને વાલીઓની મુલાકાત લઈ રહ્યા છે. બીજી તરફ, ફરાર થઈ ગયેલા આરોપી હેમંતને ઝડપી પાડવા માટે પોલીસે ૧૨ થી ૧૫ વિશેષ ટીમો બનાવીને ચક્રો ગતિમાન કર્યા છે અને રાજ્યભરમાં સઘન તપાસ હાથ ધરવામાં આવી છે.