નવી દિલ્હીના ઐતિહાસિક રામલીલા મેદાન ખાતે 'ઈન્ડિયા' ગઠબંધન દ્વારા આયોજિત ભવ્ય 'ચલો દિલ્હી' રેલી અગાઉ કોંગ્રેસના વરિષ્ઠ સાંસદ શશિ થરૂરે ચૂંટણી પ્રક્રિયા અને ચૂંટણી પંચની કામકાજ શૈલી સામે સવાલો ઉઠાવ્યા હતા. તેમણે સ્પષ્ટપણે જણાવ્યું હતું કે દેશમાં એકદમ સ્વચ્છ અને પારદર્શક ચૂંટણી રજિસ્ટર હોવું અનિવાર્ય છે, પરંતુ તેના નામે મોટા પાયે નાગરિકોના મતાધિકાર છીનવી લેવા તે ક્યારેય સ્વીકારી શકાય નહીં. થરૂરે આક્ષેપ કર્યો હતો કે ચૂંટણી પંચના પગલાંઓના કારણે દેશના વયસ્ક મતદારોનો મોટો વર્ગ પ્રભાવિત થયો છે અને આ બાબત લોકશાહીના મૂળભૂત સિદ્ધાંતો વિરુદ્ધ છે.
આ પ્રસંગે વધુ વાત કરતા શશિ થરૂરે જણાવ્યું હતું કે છેલ્લા ૮૦ વર્ષથી ભારતમાં ચૂંટણીઓ મુક્ત અને ન્યાયી માહોલમાં થતી આવી છે, પરંતુ વર્તમાન પરિસ્થિતિમાં સામૂહિક રીતે મતદારોના નામ કમી કરવાના કિસ્સા સામે આવી રહ્યા છે. તેમણે રાહુલ ગાંધીના નિવેદનને ટાંકીને ઉમેર્યું હતું કે દેશની કુલ વયસ્ક વસ્તીના આશરે ૧૫ ટકા જેટલા એટલે કે લગભગ ૧૩ કરોડ વાસ્તવિક મતદારોના નામ યાદીમાંથી હટાવી દેવાયા છે, જે અત્યંત ગંભીર સમસ્યા છે. ચૂંટણી રજિસ્ટરમાં કોઈ મૃત વ્યક્તિનું નામ રહી જાય તે ક્ષમ્ય ગણી શકાય, પરંતુ લાખો જીવતા અને સક્ષમ મતદારોને તેમના મતાધિકારથી વંચિત રાખવા તે લોકશાહી માટે ખતરો સમાન છે.
આ વિશાળ રેલીમાં માત્ર શશિ થરૂર જ નહીં, પરંતુ કોંગ્રેસના અન્ય સાંસદો અને વિપક્ષી નેતાઓએ પણ ચૂંટણી પંચની નિષ્પક્ષતા સામે ખુલ્લો વિરોધ નોંધાવ્યો હતો. કોંગ્રેસના સાંસદ અમર સિંહે તો મુખ્ય ચૂંટણી કમિશનર જ્ઞાનેશ કુમાર શાસક પક્ષ સાથે મળી ગયા હોવાનો આક્ષેપ કરી તેમના રાજીનામની માંગણી દોહરાવી હતી. રામલીલા મેદાન ખાતે યોજાયેલી આ મહારેલીમાં રાહુલ ગાંધી, મલ્લિકાર્જુન ખરગે, મમતા બેનરજી, અખિલેશ યાદવ અને તેજસ્વી યાદવ સહિતના દેશભરના શીર્ષસ્થ વિપક્ષી નેતાઓ ઉપસ્થિત રહ્યા હતા. આ પ્લેટફોર્મ પરથી વિપક્ષે દેશના બંધારણીય સત્તાવાળાઓને સ્પષ્ટ સંદેશ આપ્યો છે કે ભારતના નાગરિકોના બંધારણીય અને લોકશાહી અધિકારોનું રક્ષણ કરવા માટે તેઓ આ લડાઈ સતત જારી રાખશે.