જર્મનીમાં 'GenZ regelt!' (જન ઝેડ બધું સંભાળી લેશે) નામના યુવા સંગઠનની આગેવાની હેઠળ દેશભરમાં હજારો યુવાનોએ રસ્તાઓ પર ઉતરીને વિરોધ પ્રદર્શન કર્યું હતું. ફ્રાન્સ અને ઇટાલીના સમાન આંદોલનોથી પ્રેરિત આ વિરોધ પ્રદર્શનની શરૂઆત દિવસના સમયે અત્યંત શાંતિપૂર્ણ અને ઉત્સવના માહોલમાં થઈ હતી, જેમાં હેલોવીન પર્વને કારણે કેટલાક યુવાનો ડાયનાસોર્સ અને બેટમેન જેવા વસ્ત્રો પહેરીને જોડાયા હતા. જો કે, જેમ જેમ સાંજ ढલતી ગઈ તેમ તેમ આંદોલનનો માહોલ બદલાયો હતો અને બર્લિન, કોલોન, હામ્બર્ગ તેમજ આર્થિક રાજધાની ગણાતા ફ્રેન્કફર્ટમાં કેટલાક અસમાજિક તત્વોએ વિરોધ પ્રદર્શનને હિંસક વળાંક આપ્યો હતો.
સ્થિતિ ત્યારે બેકાબૂ બની જ્યારે ફ્રેન્કફર્ટમાં દેખાવકારોએ પોલીસકર્મીઓ પર પથ્થરો, ફટાકડા અને પેટ્રોલ બોમ્બ (મોલોટોવ કોકટેલ) ફેંકવાનું શરૂ કર્યું હતું. શહેરમાં ભારે અરાજકતા વચ્ચે એક ગન સ્ટોપ અને પરફ્યુમની દુકાન સહીત અનેક વેપારી સંકુલોના કાચ તોડીને માલસામાનની લૂંટફાટ ચલાવવામાં આવી હતી. પરિસ્થિતિને કાબૂમાં લેવા માટે પોલીસ દ્વારા વોટર કેનન અને પેપર સ્પ્રેનો આડેધડ ઉપયોગ કરવામાં આવ્યો હતો તેમજ મુખ્ય શોપિંગ સ્ટ્રીટને સીલ કરી દેવામાં આવી હતી. રાજ્યના આંતરિક પ્રધાન રોમન પોસેકે આ ઘટના પાછળ અંદાજે ૧૦૦ જેટલા ડાબેરી ઉગ્રવાદીઓ સંડોવાયેલા હોવાનું જણાવીને આ હિંસાને અત્યંત શરમજનક ગણાવી છે.
યુવા વર્ગના આ વ્યાપક રોષ પાછળ મોંઘવારી, બિસ્માર શાળાઓ, સરકાર દ્વારા કરવામાં આવતા ખર્ચમાં કાપ અને યુવા પેઢીની અવગણના જેવા ગંભીર મુદ્દાઓ જવાબદાર છે. યુવાનો સરકારની વધતી જતી સૈન્યની કિંમતો અને ફરજિયાત લશ્કરી સેવા તરફ દોરી જતા નવા મૉડેલનો પણ સખત વિરોધ કરી રહ્યા છે. આયોજકોના દાવા મુજબ આ પ્રદર્શનમાં આશરે ૧.૨૦ લાખ યુવાનોએ ભાગ લીધો હતો, જો કે આંદોલનના મુખ્ય સંચાલકોએ હિંસા અને ઉગ્રવાદથી સ્પષ્ટ અંતર જાળવી રાખ્યું છે તેમ છતાં યુરોપના અન્ય દેશોની જેમ જર્મનીમાં પણ ફાટી નીકળેલી આ હિંસાએ દેશની સુરક્ષા વ્યવસ્થા સામે મોટા પ્રશ્નાર્થ ચિન્હો ખડા કરી દીધા છે.