અંતરરાષ્ટ્રીય રાજકારણમાં મધ્ય-પૂર્વના દેશો અને અમેરિકા વચ્ચે ચાલી રહેલા તણાવ વચ્ચે એક મોટો diplomatic ખુલાસો થયો છે. ઈરાનના વિદેશ મંત્રી અબ્બાસ અરાઘચીના જણાવ્યા અનુસાર, જો અમેરિકા ઈરાનની તમામ શરતોનું પાલન કરે છે, તો વ્યૂહાત્મક રીતે મહત્વપૂર્ણ એવી 'હોરમુઝની ખાડી' માત્ર બે દિવસની અંદર ફરીથી વેપાર અને આવાગમન માટે ખુલી શકે છે. કતારના મધ્યસ્થીઓ સાથે ચાલી રહેલી સઘન બેઠકો બાદ આ પ્રસ્તાવના અમલીકરણનો સમય પાંચ દિવસથી ઘટાડીને સીધો બે દિવસ કરી દેવામાં આવ્યો છે, જે વૈશ્વિક વેપાર અને તેલ પુરવઠા માટે એક સકારાત્મક સંકેત માનવામાં આવી રહ્યો છે.
ઈરાન દ્વારા મૂકવામાં આવેલી મુખ્ય શરતોમાં ઇસ્લામાબાદ મેમોરેન્ડમ પછી લાદવામાં આવેલા આર્થિક પ્રતિબંધો પાછા ખેંચવા, પ્રદેશમાં અમેરિકી લશ્કરી દળોની હાજરી ઘટાડવી, ઓઈલ વેવર્સ પુનઃસ્થાપિત કરવા અને કતાર સહિત વિદેશી બેંકોમાં જામીનગીરી કે ફ્રીઝ કરાયેલા ઈરાની ભંડોળને મુક્ત કરવાનો સમાવેશ થાય છે. આ ઉપરાંત, ઈરાને ઓમાન સાથે ચર્ચા કરીને નક્કી કરેલા નવા શિપિંગ રૂટને સત્તાવાર માન્યતા આપવાની અને બાકીના રૂટ બંધ કરવાની પણ માંગ કરી છે. ઈરાનના ટોચના સુરક્ષા અધિકારી મોહસિન રેઝાઈએ સ્પષ્ટ કર્યું છે કે જ્યાં સુધી આ સાતેય શરતો પૂરી નહીં થાય ત્યાં સુધી કોઈ શાંતિ વાર્તા નહીં થાય અને ખાડી બંધ રહેશે.
બીજી બાજુ, અમેરિકી ઉપાષ્ટ્રપતિ જે.ડી. વાન્સ તરફથી કતારના માધ્યમથી મોકલવામાં આવેલા પત્ર બાદ વોશિંગ્ટનના સૂર બદલાયા હોવાનું ઈરાને સ્વીકાર્યું છે. અમેરિકી રાષ્ટ્રપતિ ડોનાલ્ડ ટ્રમ્પે પણ સ્વીકાર્યું છે કે ઈરાન વાટાઘાટો કરવા ઈચ્છે છે અને સમજૂતી તરફ આગળ વધી રહ્યું છે, જોકે તેમણે ઈરાનની વિશ્વસનીયતા સામે સવાલો પણ ઉઠાવ્યા છે. જો અમેરિકા આ પ્રસ્તાવ સ્વીકારીને શરતો પૂરી કરે છે, તો તે માત્ર હોરમુઝની ખાડી જ નહીં ખોલે પરંતુ બંને દેશો વચ્ચે લાંબા સમયથી અટવાયેલા વિવાદોના ઉકેલ માટે નવી વાતચીતનો માર્ગ પણ મોકળો કરશે.