વર્તમાન સમયમાં ગુનેગારો કાયદાકીય એજન્સીઓની નજરથી બચવા માટે આધુનિક ટેકનોલોજીનો ઉપયોગ કરી રહ્યા છે, જેમાં ડાર્કનેટ અને ક્રિપ્ટોકરન્સીનો સૌથી વધુ દુરુપયોગ થાય છે. આવા જ એક અત્યંત જટિલ અને આંતરરાષ્ટ્રીય સ્તરે સક્રિય ડ્રગ કાર્ટેલને શોધી કાઢવામાં ચેન્નાઈના નાર્કોટિક્સ કંટ્રોલ બ્યુરો (NCB) ઝોનને મોટી સફળતા મળી છે. આ ગંભીર અને સરાહનીય કામગીરી બદલ NCB ચેન્નાઈ ઝોનના એડિશનલ ડિરેક્ટર પી. અરવિંદન (IPS) અને સબ-ઇન્સ્પેક્ટર જુબિન સેમની ઉત્કૃષ્ટ સેવાઓની કદર કરવામાં આવી છે. તેમને ખાસ કરીને ગુપ્ત માહિતી એકત્ર કરવાની ક્ષમતા (Intelligence) અને કુશળ તપાસ માટે પ્રતિષ્ઠિત 'કેન્દ્રીય ગૃહમંત્રીદક્ષતા પદક-૨૦૨૬' એનાયત કરવામાં આવ્યો છે.
આ સફળ ઓપરેશન પાછળ અધિકારીઓની કલાકોની મહેનત અને અત્યાધુનિક ડિજિટલ ટ્રેકિંગ પદ્ધતિઓ સંકળાયેલી હતી. આ ડ્રગ સિન્ડિકેટના સંચાલકો સામાજિક કે સામાન્ય સોશિયલ મીડિયા પ્લેટફોર્મને બદલે ડાર્કનેટના એન્ક્રિપ્ટેડ પ્લેટફોર્મનો ઉપયોગ કરતા હતા, જેથી પોલીસ કે અન્ય તપાસ એજન્સીઓ માટે તેમના સુધી પહોંચવું અત્યંત મુશ્કેલ બનતું હતું. એટલું જ નહીં, નાણાકીય વ્યવહારો માટે પણ પરંપરાગત બેંકિંગ સિસ્ટમને બદલે ક્રિપ્ટોકરન્સીનો ઉપયોગ કરીને નાણાંની હેરાફેરી કરવામાં આવતી હતી. આ તમામ પડકારોને પાર કરીને NCB ચેન્નાઈની ટીમે વર્ષ ૨૦૨૬ દરમિયાન બે મોટા ડાર્કનેટ આધારિત ડ્રગ કાર્ટેલને સફળતાપૂર્વક ઉખડી ફેંક્યા હતા, જ્યારે અગાઉ વર્ષ ૨૦૨૫માં પણ આવા જ એક મોટા રેકેટનો પર્દાફાશ કરવામાં આવ્યો હતો.
આ સન્માન માત્ર બે વ્યક્તિગત અધિકારીઓની જ નહીં, પરંતુ સમગ્ર NCB ચેન્નાઈ ઝોનની વ્યુહાત્મક અને સંગઠિત કામગીરીની મોટી જીત છે. સરહદ પારથી ચાલતા આ ખતરનાક ડ્રગ નેટવર્કને સમયસર નેસ્તોનાબૂદ કરવાથી દેશના યુવાનોને નશાની કુપ્રવૃત્તિથી બચાવી શકાયા છે. આંતરરાષ્ટ્રીય સ્તરે ફેલાયેલા આ ગુનાહિત સામ્રાજ્યને ડામવામાં આ અધિકારીઓની દીર્ઘદષ્ટિ અને સાહસિક પગલાં સમગ્ર દેશની કાયદો અને વ્યવસ્થા જાળવતી એજન્સીઓ માટે એક મજબૂત ઉદાહરણ પૂરું પાડે છે. સરકાર દ્વારા આપવામાં આવેલું આ પદક તેમની અથાક મહેનત, દેશભક્તિ અને રાષ્ટ્રીય સુરક્ષા પ્રત્યેની તેમની અતૂટ પ્રતિબદ્ધતાની સાચી ઓળખ સમાન છે.
