શનિવારની સવારે અમદાવાદથી ઉડાન ભરીને કોલકાતાના નેતાજી સુભાષ ચંદ્ર બોઝ આંતરરાષ્ટ્રીય વિમાનમથક પર પહોંચેલી અકાસા એરની ફ્લાઈટ QP 1925 સાથે આ દુર્ઘટના ઘટી હતી. ફ્લાઈટ ટ્રેકિંગ વેબસાઇટ ફ્લાઇટરેડર 24ના અહેવાલ મુજબ, બોઇંગ 737 મેક્સ 8 પ્રકારનું આ આધુનિક વિમાન સવારે આશરે 7:40 વાગ્યે કોલકાતા એરપોર્ટ પર ઉતરી રહ્યું હતું. આ દરમિયાન પાઇલટે લેન્ડિંગ પ્રક્રિયામાં તકનીકી કે વાતાવરણીય મુશ્કેલી અનુભવતા 'ગો-અરાઉન્ડ' (વિમાનને ફરી હવામાં લઈ જવું) કરવાનો નિર્ણય લીધો હતો, પરંતુ આ પ્રક્રિયા દરમિયાન વિમાનનો પાછળનો ભાગ (ટેલ સેક્શન) જમીન સાથે સ્પર્શી ગયો હતો, જેને ઉડ્ડયન ભાષામાં 'ટેલ સ્ટ્રાઈક' કહેવામાં આવે છે.
આ ઘટના બાદ એરલાઇન દ્વારા સત્તાવાર નિવેદન જારી કરવામાં આવ્યું હતું જેમાં સ્પષ્ટ કરવામાં આવ્યું છે કે પ્રારંભિક મુશ્કેલી બાદ વિમાને સુરક્ષિત રીતે લેન્ડિંગ કરી લીધું હતું. વિમાનમાં સવાર તમામ મુસાફરો હેમખેમ બહાર ઉતરી ગયા હતા અને કોઈ જાનહાનિ કે ઈજાના અહેવાલ નથી. જો કે, વિમાનના ઉતરાણ પછી જ્યારે નિયમિત એન્જિનિયરિંગ તપાસ હાથ ધરવામાં આવી ત્યારે જાણવા મળ્યું કે વિમાનની પૂંછડીનો ભાગ રનવે સાથે અથડાયો હતો. સાવચેતીના ભાગરૂપે અને યાંત્રિક સલામતી સુનિશ્ચિત કરવા માટે હાલ આ વિમાનને કોલકાતા એરપોર્ટ પર જ સુરક્ષિત રીતે પાર્ક કરવામાં આવ્યું છે જ્યાં નિષ્ણાતો દ્વારા તેની ઝીણવટભરી તપાસ ચાલી રહી છે.
ઘટનાની ગંભીરતાને ધ્યાનમાં રાખીને અકાસા એર દ્વારા ઉડ્ડયન ક્ષેત્રના સ્થાપિત પ્રોટોકોલ મુજબ તમામ સંબંધિત નિયમનકારી અને સુરક્ષા સત્તામંડળોને આ બાબતની સત્તાવાર જાણ કરી દેવામાં આવી છે. હાલ આ સમગ્ર મામલો સત્તાવાર તપાસ હેઠળ છે જેથી આ ઘટના પાછળ પાઇલટની કોઈ ભૂલ હતી, હવામાન જવાબદાર હતું કે અન્ય કોઈ ટેકનિકલ કારણ હતું તેની સાચી માહિતી બહાર આવી શકે. ઉલ્લેખનીય છે કે આ ફ્લાઈટમાં કુલ કેટલા મુસાફરો સવાર હતા તેની ચોક્કસ સંખ્યા હજુ સુધી સત્તાવાર રીતે જાણી શકાઈ નથી, પરંતુ એરલાઇનની સમયસરની તકેદારી અને સુરક્ષા પ્રોટોકોલના પાલનને કારણે એક મોટો સંભવિત અકસ્માત ટળી ગયો હતો.