કેન્દ્ર સરકાર દ્વારા તાજેતરમાં કેનેડાની ફેયરફેક્સ ફાઇનાન્શિયલ હોલ્ડિંગ્સને આઈડીબીઆઈ બેંકમાં ૬૦.૭૨ ટકા નિયંત્રણ હિસ્સો અંદાજે ૫૨,૮૭૮ કરોડ રૂપિયામાં વેચવાના પ્રસ્તાવને મંજૂર કરવામાં આવ્યો છે. આ નિર્ણય બાદ બીઆરએસના કાર્યકારી અધ્યક્ષ કે. ટી. રામારાવ (કેટીઆર) એ સોશિયલ મીડિયાના માધ્યમથી સરકાર સમક્ષ આકરી પૃચ્છા કરી છે કે આટલી બધી ઉતાવળ શા માટે કરવામાં આવી રહી છે? તેમણે આ સમગ્ર ડિસઇન્વેસ્ટમેન્ટ પ્રક્રિયા સામે સવાલો ઉઠાવતા જણાવ્યું હતું કે જ્યારે બિડ્સ રિઝર્વ પ્રાઇસ કરતાં નીચે ગયા હતા, ત્યારે મૂલ્યાંકન પદ્ધતિ અને નિયમોમાં અચાનક ફેરફાર કેમ કરવામાં આવ્યા? બેંકના મૂલ્યાંકનમાં પારદર્શિતાના અભાવ અંગે તેમણે ચિંતા વ્યક્ત કરી છે.
આ અહેવાલ મુજબ, કેટીઆરે બેંકની અસ્કયામતો અને ખાસ કરીને હૈદરાબાદ જેવા પ્રાઇમ લોકેશન પર આવેલા મૂલ્યવાન રિયલ એસ્ટેટ પ્લોટ્સની ગણતરી સામે પણ વાંધો ઉઠાવ્યો છે. તેમનું માનવું છે કે બેંકના વેચાણ અગાઉ આ પ્રોપર્ટીઝનું વાસ્તવિક બજાર મૂલ્ય યોગ્ય રીતે આંકવામાં આવ્યું ન હતું અને તેને કુલ મૂલ્યાંકનમાં સામેલ કરવામાં શંકાસ્પદ સ્થિતિ સર્જાઈ છે. આ ઉપરાંત, બેંકના કર્મચારીઓ દ્વારા કરવામાં આવેલી રજૂઆતો અને તેમની ચિંતાઓને કેન્દ્ર સરકાર દ્વારા કેમ નજરઅંદાજ કરવામાં આવી રહી છે, તે અંગે પણ સવાલો પૂછવામાં આવ્યા છે. જાહેર ક્ષેત્રના ઉપક્રમો અને બેંકો દેશની રાષ્ટ્રીય સંપત્તિ સમાન છે, તેથી કોઈ પણ ખાનગી ખેલાડીને તેનું હસ્તાંતરણ કરતા પહેલા દેશવાસીઓને સ્પષ્ટ જવાબો મળવા જરૂરી છે તેમ તેમણે ભારપૂર્વક જણાવ્યું હતું.
ઉલ્લેખનીય છે કે, અગાઉ નબળી નાણાકીય સ્થિતિને કારણે મે ૨૦૧૭માં આરબીઆઈ દ્વારા આઈડીબીઆઈ બેંકને 'પીસીએ' ફ્રેમવર્કમાં મૂકવામાં આવી હતી, જેમાંથી માર્ચ ૨૦૨૧માં બેંક બહાર આવી હતી. તાજેતરના વર્ષોમાં બેંકના પ્રદર્શનમાં નોંધપાત્ર સુધારો જોવા મળ્યો છે, જેમાં માર્ચ ૨૦૨૬ સુધીમાં ગ્રોસ એનપીએ ઘટીને ૨.૩૨ ટકા અને નેટ એનપીએ ૦.૧૫ ટકા થઈ ગઈ છે તેમજ બેંકે નાણાકીય વર્ષ ૨૦૨૬માં ૯,૫૧૩ કરોડ રૂપિયાનો શાનદાર ચોખ્ખો નફો પણ નોંધાવ્યો છે. આમ, બેંકની મજબૂત થઈ રહેલી આર્થિક સ્થિતિ વચ્ચે સરકાર દ્વારા આટલા મોટા પાયે હિસ્સો વેચવાના નિર્ણય પાછળની ઉતાવળ અને પારદર્શિતાના મુદ્દે વિપક્ષ દ્વારા જોરશોરથી પ્રશ્નો ખડા કરવામાં આવી રહ્યા છે.