અંકલેશ્વર અને હાંસોટ પંથકમાં અત્યારે ખેડૂતોની મહેનતનું કાચું સોનું સમાન ડાંગરનો પાક ચારેય તરફ રસ્તા પર પથરાયેલો નજરે પડી રહ્યો છે. ખેતરમાંથી લણણી કરીને લાવવામાં આવેલા ડાંગરમાં રહેલો ભેજ સંપૂર્ણપણે દૂર થાય અને પાક સારો બને તે માટે ખેડૂતો દ્વારા આ ખાસ કવાયત કરવામાં આવી રહી છે. ડાંગરમાં જો અંદાજે 15 ટકા જેટલો ભેજ રહી જાય તો બજારમાં તેનો પૂરતો ભાવ મળતો નથી, જેના કારણે ખેડૂતો પાકને તડકામાં સારી રીતે સૂકવીને વેચાણ માટે તૈયાર કરી રહ્યા છે. અગાઉના સમયમાં ડાંગરની ખેતી ઓછી થતી અને ગામડાંઓમાં પાક સૂકવવા માટે ખળીની સુવિધા ઉપલબ્ધ હોવાથી રસ્તા પર સૂકવવાની જરૂર ઓછી પડતી હતી, પરંતુ છેલ્લા કેટલાક વર્ષોથી આ પ્રથા જોવા મળી રહી છે.
વર્તમાન સિઝનમાં હાંસોટના રોહિદથી પંડવાઈ સુધીના અંદાજે 8થી 10 કિલોમીટર લાંબા મુખ્ય માર્ગ પર ખેડૂતો ડાંગર પાથરીને બેઠા છે. ખેડૂતો માટે રાહતના સમાચાર એ છે કે આ વર્ષે ડાંગરના ભાવમાં ગત વર્ષની સરખામણીએ સારો ઉછાળો જોવા મળી રહ્યો છે. ગત વર્ષે જે ડાંગર પ્રતિમણ રૂ. 450ના ભાવે વેચાતું હતું, તે જ પાક આ વર્ષે બજારમાં પ્રતિમણ રૂ. 500થી રૂ. 520 સુધીના ઊંચા ભાવે વેચાઈ રહ્યો છે. જોકે, એક તરફ ભાવો સારા મળવાથી ખેડૂતોમાં ખુશી છે, તો બીજી તરફ આ વર્ષે ડાંગરનું કુલ ઉત્પાદન ઘટયું હોવાની પીડા પણ ખેડૂતો વ્યક્ત કરી રહ્યા છે.
ખેતી ક્ષેત્રે ચિંતાજનક બાબતો વચ્ચે આ વર્ષે કુદરતે ખેડૂતો પર કૃપા કરી છે કારણ કે હજુ સુધી માવઠું ન થતાં પાકને મોટું નુકસાન અટક્યું છે અને ખેડૂતોએ રાહતનો શ્વાસ લીધો છે. બજારમાં ડાંગરના સારા ભાવ મળી રહ્યા હોવાના કારણે ઉત્પાદન ઘટ્યાની થોડીઘણી કસર પણ પૂરી થઈ રહી છે. અંકલેશ્વર અને હાંસોટના આ પંથકમાં ખેડૂતોની આ મહેનત આગામી દિવસોમાં તેમને આર્થિક રીતે સધ્ધર બનાવવામાં મદદરૂપ સાબિત થશે તેવી આશા બંધાઈ છે. માર્ગ પર પાક સૂકવવાની આ અનોખી તસવીરો અત્યારે સમગ્ર વિસ્તારમાં ચર્ચાનો વિષય બની છે.