દેવભૂમિ દ્વારકા જિલ્લામાં આ વર્ષે નહિવત વરસાદના કારણે સર્જાયેલી દુષ્કાળ જેવી પરિસ્થિતિએ ખેડૂતો અને પશુપાલકોની ચિંતામાં મોટો વધારો કર્યો છે. ખાસ કરીને ખંભાળિયા તાલુકાના ગ્રામ્ય વિસ્તારોમાં સિંચાઈ અને પીવાના પાણીના અભાવે ખેતરોના સીમાડાઓ સંપૂર્ણપણે સુકાઈ ગયા છે. અન્નદાતાઓએ મોંઘા ભાવના બિયારણ અને રાસાયણિક ખાતર ખરીદીને ભારે મહેનતથી વાવણી કરી હતી, પરંતુ કુદરતની વક્રદૃષ્ટિના કારણે ખરીફ સીઝન નિષ્ફળ નીવડી છે. ખેતરોમાં ઉભેલો પાક નાશ પામતા ખેડૂતોની આર્થિક કમર ભાંગી ગઈ છે અને પરિવારનું ભરણપોષણ કરવું મુશ્કેલ બન્યું છે.
પાણીની આ ગંભીર કટોકટી માત્ર ખેતી પૂરતી મર્યાદિત નથી રહી, પરંતુ પશુધન માટે પણ આફત બનીને આવી છે. જિલ્લાના નદીઓ, ચેકડેમ અને કૂવા જેવા જળસ્રોતો તળિયા ઝાટક થવાથી પશુઓ માટે ઘાસચારાની તીવ્ર અછત સર્જાઈ છે. પૂરતા પ્રમાણમાં ઘાસચારો અને પાણી ન મળવાને કારણે લાચાર બનેલા માલધારીઓ અને પશુપાલકો પોતાના મૂંગા પશુઓને ગૌશાળામાં મોકલવા મજબૂર બન્યા છે. ઘેટાં અને બકરાં જેવા નાના પશુઓ રાખતા પરિવારો આખો દિવસ રઝળપાટ કરવા છતાં માંડ એક વખત પાણીની વ્યવસ્થા કરી શકી રહ્યા છે, જેના કારણે પશુધનના અસ્તિત્વ સામે મોટો ખતરો ઊભો થયો છે.
આ વિકટ પરિસ્થિતિમાંથી બહાર આવવા માટે જિલ્લાના ખેડૂતો અને પશુપાલકો દ્વારા સરકાર સમક્ષ ઉગ્ર માગ કરવામાં આવી છે. તેમની મુખ્ય માગણી છે કે સૌની યોજના અંતર્ગત વિસ્તારના ખાલી ડેમોમાં તાત્કાલિક પાણી ભરવામાં આવે અને પશુઓ માટે રાહત દરે પૂરતો ઘાસચારો ઉપલબ્ધ કરાવવામાં આવે. બીજી તરફ, સિંચાઈ વિભાગના જણાવ્યા અનુસાર હાલ જિલ્લાના જળાશયોમાં માત્ર એકથી બે ટકા જ પાણીનો જથ્થો બચ્યો છે અને તંત્રની પ્રથમ પ્રાથમિકતા પીવાનું પાણી પૂરું પાડવાની છે. જોકે, ખેડૂતોની આર્થિક સ્થિતિ અને પશુધનને બચાવવા માટે સરકાર સ્તરેથી વહેલી તકે કોઈ નક્કર રાહત પેકેજ કે સિંચાઈ માટે પાણી છોડવાની જાહેરાત થાય તેવી પ્રબળ લોકમાંગ ઉઠી છે.
![[પુત્રના અકસ્માત મૃત્યુના કેસમાં વળતરની રાહ જોતા વૃદ્ધ દંપતીનું કરૂણ મૃત્યુ]](/media/news_images/main_img_20261025_094039_4a8aef.jpg)
