જામનગર શહેરના પોલીસ હેડક્વાર્ટરમાં ચાલી રહેલી તાલીમ દરમિયાન એક ગંભીર કહી શકાય તેવી ઘટના સામે આવી છે. અહીં તાલીમ મેળવી રહેલા અઢાર જેટલા પોલીસ જવાનોને કેન્ટીનમાં ભોજન લીધાા બાદ અચાનક સ્વાસ્થ્ય બગડ્યું હતું. ભોજન કર્યાની થોડી જ કલાકોમાં આ તમામ યુવાન તાલીમાર્થીઓને ઝાડા અને ઉલ્ટીની ગંભીર તકલીફ શરુ થતાં ચકચાર મચી ગઈ હતી. ઘટનાની ગંભીરતાને ધ્યાનમાં રાખીને તંત્ર દ્વારા તાત્કાલિક ધોરણે તમામ અસરગ્રસ્ત જવાનોને સારવાર અર્થે સ્થાનિક સરકારી જી.જી. હોસ્પિટલમાં ખસેડવામાં આવ્યા હતા.
હોસ્પિટલના સૂત્રો દ્વારા પ્રાપ્ત થયેલી માહિતી અનુસાર, જવાનોને હોસ્પિટલ પહોંચાડ્યા બાદ તબીબોની ટીમે ત્વરિત સારવાર શરૂ કરી હતી. પ્રાથમિક સારવાર અને યોગ્ય દવાઓ આપ્યા બાદ મોટાભાગના જવાનોની તબિયતમાં ઝડપથી સુધારો જોવા મળ્યો હતો. સારવાર મેળવેલા અઢાર જવાનો પૈકી પંદર જવાનોને તબિયત સંપૂર્ણપણે સ્વસ્થ જણાતા હોસ્પિટલમાંથી રજા આપવામાં આવી છે અને તેઓ હેડક્વાર્ટર પર પરત ફર્યા છે.
હજુ પણ સાવચેતીના ભાગરૂપ ત્રણ તાલીમાર્થી જવાનોને તબીબોની વિશેષ દેખરેખ હેઠળ હોસ્પિટલના ઓબ્ઝર્વેશન વોર્ડમાં રાખવામાં આવ્યા છે, જેમની સ્થિતિ પણ સ્થિર હોવાનું જાણવા મળ્યું છે. આ બનાવને પગલે પોલીસ બેડામાં ચિંતાનું મોજું ફરી વળ્યું છે કે કેન્ટીનના ભોજનમાં ખરેખર શું ગરબડ થઈ હતી. હેડક્વાર્ટર સ્થિત કેન્ટીનની ખાદ્ય સામગ્રી અને ભોજનની ગુણવત્તા સામે સવાલો ઉભા થયા છે, ત્યારે આ બાબતે સંબંધિત વિભાગ દ્વારા આગળની તપાસ હાથ ધરવામાં આવે તેવી શક્યતા છે જેથી ભવિષ્યમાં આવી ઘટનાઓનું પુનરાવર્તન ન થાય.
![[સરકારી કર્મચારીઓ માટે તમિલનાડુ સરકારનો કડક આદેશ, વ્યક્તિગત રજૂઆતો બાબતે ચેતવણી]](/media/news_images/main_img_20261024_185516_1f3606.jpg)
