દેવભૂમિ દ્વારકા જિલ્લામાંથી પોલીસ વિભાગને શર્મસાર કરતો એક મોટો અને ચકચારી કિસ્સો પ્રકાશમાં આવ્યો છે, જેમાં સ્પેશિયલ ઓપરેશન ગ્રુપની કામગીરી સામે ગંભીર સવાલો ઉભા થયા છે. પ્રાપ્ત વિગતો અનુસાર, અગાઉ એક કેસના સિલસિલામાં એસઓજીની ટીમે એક આરોપીની મોટરકાર કબજે કરી હતી. આ કાર્યવાહી દરમિયાન કારમાંથી લાખો રૂપિયાની રોકડ રકમ ગાયબ થઈ ગઈ હતી. આ મામલે પીડિત આરોપીએ તીવ્ર રોષ વ્યક્ત કરતા રાજકોટ રેન્જ આઈજી સમક્ષ રૂબરૂ લેખિત રજૂઆત કરી હતી કે એસઓજીના કર્મચારીઓ જ તેની મોટરમાંથી લાખો રૂપિયાની રોકડ રકમ સેરવી ગયા છે.
આ ગંભીર આક્ષેપ અને પ્રાથમિક તપાસના આધારે રાજકોટ રેન્જ આઈજીએ સખત પગલાં લેતા તાકીદની અસરથી મોટી કાર્યવાહી કરી છે. દેવભૂમિ દ્વારકા એસઓજીમાં ફરજ બજાવતા સહાયક સબ ઇન્સ્પેક્ટર રાજભા જાડેજા, કિશોરસિંહ ભગુભા જાડેજા, પૃથ્વીરાજસિંહ વાઘેલા અને કરણ સોંદરવા નામના ચાર પોલીસકર્મીઓને તુરંત જ સસ્પેન્ડ કરી દેવામાં આવ્યા છે. આ સાથે જ શિસ્તભંગના આ ગંભીર પગલાં રૂપે આ ચારેય કર્મચારીઓની સુરેન્દ્રનગર જિલ્લામાં બદલી કરવાનો હુકમ પણ જારી કરવામાં આવ્યો છે, જેનાથી સમગ્ર પોલીસ વિભાગમાં ભારે હડકંપ મચી ગયો છે.
માત્ર કર્મચારીઓ જ નહીં પરંતુ દેવભૂમિ દ્વારકા જિલ્લા પોલીસ વડા દ્વારા પણ આ મામલે કડક વલણ અપનાવવામાં આવ્યું છે. એસઓજી ટીમની આ ગંભીર બેદરકારી અને અનિયમિતતાને ધ્યાનમાં રાખીને દ્વારકા એસઓજીના પોલીસ ઇન્સ્પેક્ટર વી.એ. રાણાને લીવ રિઝર્વમાં મૂકી દેવામાં આવ્યા છે. તેમના સ્થાને હવે અન્ય પોલીસ ઇન્સ્પેક્ટર ગુર્જરને એસઓજીના પોલીસ ઇન્સ્પેક્ટર તરીકેનો નવો ચાર્જ સોંપવામાં આવ્યો છે. એકસાથે ચાર પોલીસકર્મીઓનું સસ્પેન્શન, જિલ્લા બહાર તડીપાર જેવી બદલી અને પીઆઈ પરની કાર્યવાહીથી સમગ્ર જિલ્લાના પોલીસબેડામાં ખળભળાટ મચી ગયો છે અને ખાખી વર્દીની છબી ખરડાઈ હોવાની ચર્ચાએ જોર પકડ્યું છે.
![[સરકારી કર્મચારીઓ માટે તમિલનાડુ સરકારનો કડક આદેશ, વ્યક્તિગત રજૂઆતો બાબતે ચેતવણી]](/media/news_images/main_img_20261024_185516_1f3606.jpg)
