દેવભૂમિ દ્વારકા જિલ્લામાં આ વર્ષે મેઘરાજાની કૃપા નહિવત રહેતા માત્ર પાંચ ઈંચ જેટલો જ વરસાદ નોંધાયો છે, જેના કારણે સમગ્ર વિસ્તારમાં દુષ્કાળ જેવી ગંભીર પરિસ્થિતિનું નિર્માણ થયું છે. ખાસ કરીને કલ્યાણપુર, ખંભાળીયા, દ્વારકા અને ભાણવડ પંથકમાં વરસાદના અભાવે જળસંકટ ઘેરું બન્યું છે. સ્થિતિ એવી છે કે સ્થાનિક ગ્રામીણ વિસ્તારોમાં આઠ થી દસ દિવસે માંડ એક વખત પીવાનું પાણી મળી રહ્યું છે. આવી વિકટ પરિસ્થિતિમાં માનવીઓની સાથે સાથે મૂંગા પશુઓ માટે પણ પાણી અને ઘાસચારાનો મોટો પ્રશ્ન ઊભો થયો છે, જેને કારણે લાચાર ખેડૂતો પોતાના પરિવાર અને પશુધન સાથે અન્યત્ર હિજરત કરવા માટે મજબૂર બન્યા છે.
આ ગંભીર કટોકટી છતાં પ્રશાસન અને સરકાર દ્વારા આ વિસ્તારને દુષ્કાળગ્રસ્ત જાહેર કરવામાં આવ્યો નથી અને રાહત કાર્યોનો આરંભ કરવામાં આવ્યો નથી, જેને લઈને સ્થાનિક ખેડૂતો અને જનતામાં રોષની લાગણી ફેલાઈ ગઈ છે. આ મામલે આમ આદમી પાર્ટીના પ્રદેશ અધ્યક્ષે સરકાર સામે આકરા પ્રહારો કરતા ઉગ્ર રોષ વ્યક્ત કર્યો છે. તેમણે જણાવ્યું હતું કે ખેડૂતોના ઘરોમાં ખાવા માટે અનાજ નથી અને પશુઓને નાખવા માટે ઘાસચારો નથી છતાં સરકાર શાની રાહ જોઈ રહી છે? જનતા પોતાના પ્રજાકીય ટેક્સના નાણાંમાંથી સહાયની માંગ કરી રહી છે ત્યારે સરકારની ઉદાસીનતા સામે અનેક સવાલો ઉભા થયા છે.
વધુમાં તેમણે ઉદાહરણ આપતા જણાવ્યું હતું કે મહારાષ્ટ્રમાં પણ ભાજપની જ સરકાર છે અને ત્યાં અછતગ્રસ્ત વિસ્તારોમાં રાહત પેકેજ તેમજ દુષ્કાળ જાહેર કરવામાં આવ્યો છે, તો પછી ગુજરાત સરકાર આ બાબતે કેમ મૌન સેવી રહી છે? ખેડૂતો અને પશુપાલકોને સમયસર ન્યાય અને સહાય પૂરી પાડવામાં નિષ્ફળ રહેલી સરકાર સામે હવે પ્રજામાં આક્રોશ ભભૂકી ઉઠ્યો છે. જો તાત્કાલિક ધોરણે પીવાના પાણીની વ્યવસ્થા, પશુઓ માટે ઘાસચારો અને રાહત કામો શરૂ કરવામાં નહીં આવે તો પરિસ્થિતિ વધુ વણસી શકે છે, તેવી આશંકા સ્થાનિક અગ્રણીઓ દ્વારા વ્યક્ત કરવામાં આવી રહી છે.
![[સરકારી કર્મચારીઓ માટે તમિલનાડુ સરકારનો કડક આદેશ, વ્યક્તિગત રજૂઆતો બાબતે ચેતવણી]](/media/news_images/main_img_20261024_185516_1f3606.jpg)
