ગત કેટલાક સમયથી અનેકવિધ આર્થિક અને વૈશ્વિક પડકારો સામે ઝઝૂમી રહેલા વિશ્વપ્રસિદ્ધ સિરામિક ઉદ્યોગને વધુ એક ગંભીર આર્થિક ફટકો લાગ્યો છે. મોરબીના આ અગ્રણી ઉદ્યોગમાં વપરાતા પ્રોપેન ગેસના ભાવમાં કિલોગ્રામ દીઠ સાત રૂપિયા અને ત્રીસ પૈસાનો તોતિંગ વધારો ઝીંકી દેવામાં આવ્યો છે. કંડલા અને પોરબંદરથી મોરબી તરફ આવતા પ્રોપેન ગેસના ભાવમાં થયેલા આ વધારાના કારણે ઉદ્યોગકારોમાં ભારે રોષ અને ચિંતાની લાગણી ફેલાઈ ગઈ છે. અગાઉથી જ કારમી મંદી, કાચા માલના ઊંચા ભાવો અને આંતરરાષ્ટ્રીય બજારમાં કન્ટેનરના મોંઘા ભાડાથી પરેશાન ઉદ્યોગકારો માટે આ ભાવવધારો ઘામાં મીઠું ભભરાવવા સમાન સાબિત થયો છે.
આંતરરાષ્ટ્રીય સ્તરે સર્જાયેલી યુદ્ધની પરિસ્થિતિ અને ખાડી દેશોની અસ્થિરતાના કારણે ગેસ સંકટ ઊભું થયું છે. અત્યાર સુધી નેચરલ ગેસ કરતા પ્રોપેન ગેસ પ્રમાણમાં સસ્તો મળતો હોવાથી ઉદ્યોગકારો તે વિકલ્પ અપનાવીને પોતાનું ઉત્પાદન ચાલુ રાખી શકતા હતા. પરંતુ હવે પ્રોપેન ગેસના ભાવો પણ વધીને નેચરલ ગેસની સમકક્ષ પહોંચી ગયા હોવાથી ઉદ્યોગકારો પાસેથી સસ્તા બળતણનો આખરી વિકલ્પ પણ છીનવાઈ ગયો છે. આંતરરાષ્ટ્રીય બજારમાં નિકાસ ઠપ્પ હોવાના કારણે મોરબીના અંદાજે સાઠ ટકા જેટલા એકમો પહેલેથી જ બંધ હાલતમાં છે અને જે એકમો ચાલુ છે તેઓ પણ માંડ ડચકા ખાઈ રહ્યા છે.
આ વિકટ પરિસ્થિતિમાં ઉત્પાદન ખર્ચ સતત વધી રહ્યો છે પરંતુ તૈયાર માલનો ઉપાડ નહિવત હોવાથી ટાઇલ્સના ભાવોમાં પણ આગામી સમયમાં મોટો વધારો કરવાની ફરજ પડે તેવી પૂરી શક્યતા છે. ચીન અને તુર્કી જેવા દેશોના સિરામિક ઉદ્યોગો સામે આંતરરાષ્ટ્રીય હરીફાઈમાં ટકી રહેવું મોરબીના ઉત્પાદકો માટે હવે અશક્ય જેવું બની ગયું છે. ગેસ અને વીજળીના આકરા ભાવવધારાને કારણે સમગ્ર ઉદ્યોગ ભારે મંદીના ખપ્પરમાં હોમાઈ રહ્યો છે, જેની સીધી અસર આ સાથે જોડાયેલા લાખો શ્રમિકોની રોજીરોટી ઉપર પણ પડી રહી છે અને રોજગારીનું ગંભીર સંકટ તોળાઈ રહ્યું છે.
