વિદેશની ધરતી પરથી એક અત્યંત વિચિત્ર અને ચોંકાવનારી ઘટના સામે આવી છે, જેમાં એક સામાન્ય સ્નેહ પ્રદર્શન ગંભીર ઈજામાં પરિણમ્યું હતું. ચીનના જિયાંગસુ પ્રાંતમાં રહેતી એક મહિલાને તેના પતિ દ્વારા પ્રેમથી ભેટી પડવા માત્રથી શરીરની પાંસળીઓમાં ગંભીર ફ્રેક્ચર થઈ ગયા હતા. ઠંડી લાગવાની ફરિયાદ કરતી પત્નીને આશ્વાસન આપવા માટે પતિએ જ્યારે તેને સામાન્ય તાકાતથી આલિંગનમાં લીધી, ત્યારે અચાનક હાડકાં તૂટવાનો અવાજ આવ્યો હતો. આ દુર્ઘટના બાદ પીડિત મહિલા પીડાથી કરાતી ગઈ અને તેને તાત્કાલિક તબીબી સહાય માટે ખસેડવામાં આવી હતી.
અહીંના તબીબો દ્વારા કરવામાં આવેલી એક્સ-રે અને સીટી સ્કેન તપાસમાં ચોંકાવનારો ખુલાસો થયો હતો કે મહિલાની કુલ પાંચ પાંસળીઓ તૂટી ગઈ છે અને અન્ય એક પાંસળીમાં પણ ક્રેક થઈ છે. તબીબી નિષ્ણાતોના મતે, આ બનાવ પાછળનું મુખ્ય કારણ 'ઓસ્ટિયોપોરોસિસ' નામની બીમારી છે, જેના કારણે હાડકાં અત્યંત નબળા અને પોલા થઈ જાય છે. મહિલાની જીવનશૈલી અને આહાર સંબંધિત ટેવો પણ આ નબળાઈ માટે જવાબદાર હોવાનું સામે આવ્યું છે, જેમાં રાત્રિનું જમવાનું છોડી દેવું, પૂરતા પ્રમાણમાં સૂર્યપ્રકાશ ન મળવાને કારણે વિટામિન ડીની ઉણપ અને દૈનિક ધોરણે કોફીનું સેવન સામેલ છે. કોફીમાં રહેલું કેફીન શરીરમાંથી કેલ્શિયમનું પ્રમાણ ઘટાડે છે.
સદનસીબે, ફેફસાંને કોઈ ગંભીર નુકસાન ન પહોંચ્યું હોવાથી તબીબોએ સર્જરી કરવાની જરૂરિયાત નહોતી જણાવી. માત્ર દવાઓ, મલમ અને પૂરતા આરામની સલાહ આપીને તેને હોસ્પિટલમાંથી રજા આપવામાં આવી છે. હાલ મહિલા પોતાના ઘેર સાજા થઈ રહી છે અને નિયમિતપણે તબીબી તપાસ માટે જઈ રહી છે. આ અસાધારણ ઘટના સોશિયલ મીડિયા પર ભારે વાયરલ થઈ છે અને લોકોમાં હાડકાંની મજબૂતાઈ તથા સ્વાસ્થ્ય પ્રત્યે જાગૃતિ ફેલાવી રહી છે. તબીબોએ પણ હાડકાંને સ્વસ્થ રાખવા માટે પૂરતું કેલ્શિયમ, વિટામિન ડી, સૂર્યપ્રકાશ અને યોગ્ય વ્યાયામ કરવા પર વિશેષ ભાર મૂક્યો છે.
