ગાંધીનગરના ખોરજ ગામની કરોડો રૂપિયાની કિંમતની જમીનના વિવાદે હવે રાજ્યના રાજકારણમાં ભારે ચકચાર મચાવી દીધી છે. જમીન વેચાણના મામલાને લઈને એક ખેડૂતનું સબ રજિસ્ટ્રાર કચેરી પાસેથી જ અપહરણ કરવામાં આવ્યું હોવાની ગંભીર ફરિયાદ સામે આવી છે. અપહૃત થયેલા ખેડૂત પોપટજી ઠાકોરના પત્નીએ અડાલજ પોલીસ મથકમાં ફરિયાદ નોંધાવી છે કે તેમના પતિનું રવિ ઠાકોર અને અન્ય શખ્સો દ્વારા અપહરણ કરવામાં આવ્યું છે અને આ સમગ્ર પ્રકરણમાં કોંગ્રેસના દિગ્ગજ નેતા જગદીશ ઠાકોરનું નામ પણ ઉછળ્યું છે, જેના કારણે વિવાદે નવો જ વળાંક લીધો છે.
પ્રાપ્ત વિગતો અનુસાર ખોરજ ગામની સીમમાં આવેલી આ સોળ વિઘાથી વધુ જમીનનો સોદો અન્ય વ્યક્તિઓને કરવાનો હતો, પરંતુ આરોપીઓએ આ જમીન જગદીશ ઠાકોરને જ વેચાણ આપવા માટે દબાણ કર્યું હતું. નિર્ધારિત દિવસે જ્યારે ખેડૂતો દસ્તાવેજ કરવા પહોંચ્યા ત્યારે અચાનક ત્રાટકેલા શખ્સોએ હુમલો કરી પોપટજી ઠાકોર અને તેમના સાળાને બળજબરીપૂર્વક કારમાં બેસાડી અપહરણ કરી લીધા હતા. સાળાને રસ્તામાં છોડી દેવામાં આવ્યા હોવા છતાં અપહૃત ખેડૂતનો હજુ સુધી કોઈ પત્તો લાગ્યો નથી. પીડિત ખેડૂતની પત્નીએ આક્ષેપ કર્યો છે કે આરોપીઓએ જગદીશ ઠાકોરની મદદથી તેમના પતિને અજ્ઞાત સ્થળે ગોંધી રાખ્યા છે અને તેમના પ્રાણ પર સતત જોખમ તોળાઈ રહ્યું છે.
આ ગંભીર મામલે રાજકીય ગરમાવો આવ્યો છે ત્યારે કોંગ્રેસ નેતા જગદીશ ઠાકોરે પોતાના પર લાગેલા તમામ આક્ષેપોને નકારી કાઢ્યા છે. તેમણે સોશિયલ મીડિયાના માધ્યમથી સ્થાનિક પોલીસ સામે જ ગંભીર આરોપો મૂકતા જણાવ્યું છે કે પોલીસ દ્વારા ખેડૂતો પર દસ્તાવેજ કરવા માટે દબાણ કરવામાં આવી રહ્યું છે અને ધમકાવવામાં આવી રહ્યા છે. આ પ્રકરણમાં વિવિધ રાજકીય પક્ષોના આગેવાનોના નામ પણ ચર્ચામાં આવ્યા છે ત્યારે અડાલજ પોલીસે ગુનો નોંધીને અપહૃત ખેડૂતની ભાળ મેળવવા અને સમગ્ર સત્ય બહાર લાવવા માટે સઘન તપાસના ચક્રો ગતિમાન કર્યા છે.
