અમદાવાદ શહેરમાં આજીવિકાની શોધમાં આવેલા ત્રિપુરાના ઓગણીસ વર્ષીય આદિવાસી યુવક લસોનજીત રીયાંગ સાથે જાતિગત ઓળખને લઈને થયેલી છેડતી અને પજવણીનો એક વિડિયો સામાજિક માધ્યમો પર વાયરલ થતાં ઉત્તર પૂર્વના રાજ્યો સહિત દેશભરમાં ભારે આક્રોશ ફેલાયો છે. ઉત્તર ત્રિપુરાના આનંદ બજાર વિસ્તારના વતની એવા આ યુવકે રોજગારીની તલાશમાં ગુજરાતની આર્થિક રાજધાની ગણાતા અમદાવાદની વાટ પકડી હતી. અંદાજે એક મહિના અગાઉ બનેલી આ ઘટનામાં કેટલાક સ્થાનિક શખ્સો દ્વારા યુવકની ઓળખ બાબતે અશોભનીય સવાલો કરવામાં આવ્યા હતા અને તેને ચીનના રાષ્ટ્રપતિ તરીકે સંબોધીને તેની મજાક ઉડાવવામાં આવી હતી.
આ ગંભીર ઘટના અંગે પીડિત યુવકે પોતાની આપવીતી જણાવતા કહ્યું કે, તે રાત્રે નોકરીના ઇન્ટરવ્યુ માટે એક ભોજનાલયમાં ગયો હતો અને બીજા દિવસે સવારે જ્યારે તે પરત ફરી રહ્યો હતો ત્યારે આ બનાવ બન્યો હતો. અંદાજે નવથી દસ જેટલા લોકોના ટોળાએ તેને ઘેરી લીધો હતો અને તેની સાથે અસભ્ય વર્તન કર્યું હતું. તેમાંથી માત્ર એક જ વ્યક્તિને તે ઓળખતો હતો જેણે તેને ભોજનાલયનું સરનામું મોકલ્યું હતું, જ્યારે બાકીના તમામ લોકો તેના માટે અજાણ્યા હતા. યુવકના જણાવ્યા અનુસાર શરૂઆતમાં તેને ખ્યાલ નહોતો કે તેનો કોઈ વિડિયો બનાવી રહ્યું છે અને જ્યારે એક મિત્રએ સોશિયલ મીડિયા પર આ ક્લિપ મોકલી ત્યારે તેને આખી ઘટનાની જાણ થઈ હતી.
આ અમાનવીય અને અપમાનજનક વર્તનથી આઘાત પામેલા લસોનજીત રીયાંગે દુઃખ વ્યક્ત કરતા સવાલ ઉઠાવ્યો છે કે, આપણે બધા ભારતીયો છીએ છતાં આ પ્રકારે ભારતીય નાગરિકો સાથે જ પજવણી અને ભેદભાવ કેમ કરવામાં આવે છે? આ ઘટના સામે આવ્યા બાદ દેશભરમાંથી કસૂરવારો સામે કાયદેસરની કડક કાર્યવાહી કરવાની અને પીડિત યુવકને સત્વરે ન્યાય અપાવવાની પ્રબળ માંગ ઉઠી રહી છે. સ્થાનિક સ્તરે અનેક સંગઠનોએ આ પ્રકારની માનસિકતા સામે લાલ આંખ કરી છે, કારણ કે આ ઘટનાએ રાષ્ટ્રીય એકતા અને અખંડિતતા સામે મોટા સવાલો ખડા કર્યા છે. પ્રશાસન અને પોલીસ તંત્ર દ્વારા આ મા્મલે ગંભીર નોંધ લઈને યોગ્ય તપાસ હાથ ધરવામાં આવે તેવી લોકલાગણી પ્રબળ બની છે.
