અમદાવાદ શહેરમાં થોડા સમય પહેલાં આયોજિત ચકચારી 'ફોક રાસ' ગરબા મહોત્સવ દરમિયાન એક યુવકના કાન કાપી નાખવાની ગંભીર ઘટના બની હતી. આ મામલે અત્યારે એક નવો અને ચોંકાવનારો વળાંક સામે આવ્યો છે. પોલીસ ચોપડે ફરાર અને વોન્ટેડ જાહેર કરાયેલ મુખ્ય આરોપી ભાવિક ગજ્જર સોશિયલ મીડિયા પર અચાનક સક્રિય થઈ ગયો છે અને તેણે પોતાનો એક નવો વીડિયો જાહેર કર્યો છે. આ વાયરલ વીડિયોના કારણે સમગ્ર રાજ્યમાં ચકચાર મચી ગઈ છે અને પોલીસ તંત્રની દોડધામ વધી ગઈ છે.
સામે આવેલા આ વીડિયોમાં આરોપી ભાવિક ગજ્જરે પોલીસ પ્રશાસન અને ફરિયાદી પરિવાર પર જ ઊલટાના ગંભીર આક્ષેપો કર્યા છે. તેણે વીડિયોમાં સવાલ ઉઠાવ્યો છે કે આ ઘટનાના સંપૂર્ણ સીસીટીવી ફૂટેજ જનતા સમક્ષ કેમ રજૂ કરવામાં નથી આવી રહ્યા અને માત્ર એકતરફી કાર્યવાહી કેમ કરવામાં આવી રહી છે. આ ઉપરાંત, તેણે રાજ્યના મુખ્યમંત્રી, નાયબ મુખ્યમંત્રી તેમજ ઉચ્ચ પોલીસ અધિકારીઓને સંબોધીને આ મામલે નિષ્પક્ષ અને ન્યાયી તપાસ કરવાની અપીલ કરી છે. પોલીસ પકડથી દૂર રહેલો આરોપી ખુલ્લેઆમ વીડિયો બનાવીને સોશિયલ મીડિયા પર વાયરલ કરતો હોવાથી કાયદો અને વ્યવસ્થા સામે પણ અનેક સવાલો ઊભા થયા છે.
એક તરફ પોલીસ આરોપીને ઝડપી પાડવા માટે વિવિધ ટીમો બનાવીને ચક્રો ગતિમાન કરી રહી હોવાનો દાવો કરી રહી છે, તો બીજી તરફ વોન્ટેડ આરોપી જાહેરમાં વીડિયો અપલોડ કરી રહ્યો છે જે પોલીસની કાર્યક્ષમતા પર પ્રશ્નાર્થ ચિહ્ન મૂકે છે. આ ઘટનાક્રમ બાદ સામાન્ય લોકો અને સોશિયલ મીડિયા પર રોષ જોવા મળી રહ્યો છે કે આટલી ટેકનોલોજી અને પોલીસ બળ હોવા છતાં આરોપી પોલીસની પકડથી દૂર કેમ છે. હાલમાં પોલીસ તંત્ર આ નવા વાયરલ વીડિયોને આધારે આરોપીનું લોકેશન ટ્રેક કરીને તેને વહેલી તકે જેદરમાં પૂરવા માટેના સઘન પ્રયાસો કરી રહી છે.
