કોંગો પ્રજાસત્તાકમાંથી શરૂ થયેલા ઇબોલા વાયરસે આફ્રિકાના અન્ય દેશોમાં પણ પગપેસારો કરતાં વૈશ્વિક સ્તરે આરોગ્ય ચિંતાઓ તીવ્ર બની છે. આ અતિ ખતરનાક અને જીવલેણ વાયરસ હવે નાઈજીરિયા, યુગાન્ડા અને કેન્યા સુધી પહોંચી ગયો છે, જેના કારણે સંબંધિત દેશોની સરકારી અને આરોગ્ય યંત્રણાઓ એલર્ટ મોડ પર આવી ગઈ છે. નાઈજીરિયામાં તાજેતરમાં જ યુગાન્ડાથી આવેલી એક મહિલામાં ઇબોલા સંક્રમણની પુષ્ટિ કરવામાં આવી છે, ત્યારબાદ આરોગ્ય વિભાગ દ્વારા તાત્કાલિક ધોરણે સંપર્કમાં આવેલા લોકોની ભાળ મેળવવાની કામગીરી એટલે કે કૉન્ટેક્ટ ટ્રેસિંગ શરૂ કરી દેવામાં આવ્યું છે જેથી સંક્રમણ વધુ ન ફેલાય.
આ અગાઉ યુગાન્ડામાં પણ સરહદ પાર કરીને સારવાર માટે આવેલા કોંગોના દર્દીઓને કારણે ઇબોલાનો ફાટી નીકળેલો પ્રકોપ જોવા મળ્યો હતો, જો કે હવે સ્થિતિ નિયંત્રણમાં હોવાનું જણાવીને તે પ્રકોપના અંતની સત્તાવાર જાહેરાત કરવામાં આવી ચૂકી છે. બીજી તરફ કેન્યામાં પણ કોંગોથી આવેલા એક પ્રવાસી સાથે સંકળાયેલા ઇબોલાના નવ કેસો નોંધાયા છે, જેણે ચિંતામાં વધુ વધારો કર્યો છે. સૌથી ગંભીર બાબત એ છે કે આ કેસોમાં કેટલાક આરોગ્ય કર્મચારીઓ પણ સંક્રમણનો ભોગ બન્યા છે, જેના કારણે ડાક્ટરો અને નર્સોની સુરક્ષા સામે પણ મોટો પ્રશ્ન ખડો થયો છે.
વિશ્વ આરોગ્ય સંસ્થા અને આંતરરાષ્ટ્રીય સ્વાસ્થ્ય એજન્સીઓ આ સ્થિતિ પર સતત નજર રાખી રહી છે. વાયરસના ફેલાવાને રોકવા માટે એરપોર્ટ અને સરહદી વિસ્તારોમાં સ્ક્રીનીંગ તેમજ તપાસ સઘન બનાવવામાં આવી છે. નિષ્ણાતોના મતે, જો સમયસર કડક પગલાં નહીં ભરવામાં આવે તો આ રોગચાળો મોટું સ્વરૂપ ધારણ કરી શકે છે. આ ગંભીર પરિસ્થિતિને ધ્યાનમાં રાખીને નાગરિકોને પણ સાવચેત રહેવા અને જરૂરી તકેદારી રાખવાની સલાહ આપવામાં આવી રહી છે.
