રાજ્યની સરકારી શાળાઓમાં શિક્ષણનું વાતાવરણ શિસ્તબદ્ધ અને સુરક્ષિત જળવાઈ રહે તે હેતુસર શિક્ષણ વિભાગ દ્વારા એક મહત્વપૂર્ણ અને કડક પરિપત્ર જાહેર કરવામાં આવ્યો છે. આ નવા નિયમ અનુસાર, હવે વાલીઓ સિવાયના કોઈપણ બિન-અધિકૃત વ્યક્તિ અથવા રાજકીય નેતાઓ શાળાના આચાર્યની પૂર્વ લેખિત મંજૂરી વગર શાળા પરિસરમાં પ્રવેશ કરી શકશે નહીં. છેલ્લા કેટલાક સમયથી શૈક્ષણિક કાર્ય દરમિયાન બહારના લોકોની અવરજવર વધવાને કારણે અભ્યાસ પર વિપરીત અસર પડતી હોવાની ફરિયાદો મળી રહી હતી, જેને ધ્યાનમાં રાખીને આ નિર્ણય લેવામાં આવ્યો છે. શાળામાં પ્રવેશ મેળવવા માટે પ્રત્યેક મુલાકાતીએ ફરજિયાતપણે મુલાકાતી રજિસ્ટરમાં પોતાની વિગતો નોંધાવવાની રહેશે.
આ નવા પરિપત્ર મુજબ શાળાના આચાર્યની સ્પષ્ટ મંજૂરી વિના કોઈપણ વ્યક્તિ વર્ગખંડ, પ્રયોગશાળા, પુસ્તકાલય કે રમતના મેદાન જેવા શૈક્ષણિક વિસ્તારોમાં જઈ શકશે નહીં. આ ઉપરાંત શાળાના પરિસરમાં વિદ્યાર્થીઓ કે શિક્ષકોની પરવાનગી વગર કોઈપણ પ્રકારની ફોટોગ્રાફી, વીડિયોગ્રાફી, ઓડિયો રેકોર્ડિંગ કે લાઈવ સ્ટ્રીમિંગ કરવા પર પણ સંપૂર્ણ પ્રતિબંધ મૂકવામાં આવ્યો છે. જો કોઈ વ્યક્તિ શાળાની સુરક્ષા કે ગોપનીયતાના ભંગનો પ્રયાસ કરશે અથવા શાળાની શૈક્ષણિક કામગીરીમાં અવરોધ ઊભો કરશે, તો આચાર્ય તેને શાળા છોડવાનો આદેશ આપી શકશે અને જરૂર પડ્યે પોલીસ તથા ઉચ્ચ અધિકારીઓને જાણ કરી કાયદેસરની કાર્યવાહી કરવામાં આવશે.
શૈક્ષણિક સંસ્થાઓની સાથે સાથે આ પરિપત્રમાં વિદ્યાર્થીઓની સુરક્ષા અને ગોપનીયતાને પણ સર્વોચ્ચ પ્રાથમિકતા આપવામાં આવી છે. શાળાઓને કડક સૂચના આપવામાં આવી છે કે તેઓ વિદ્યાર્થીઓની વ્યક્તિગત માહિતી, ફોટોગ્રાફ્સ કે વીડિયોઝ એવી રીતે સંગ્રહિત કે પ્રસારિત ન કરે જેનાથી તેમની ગોપનીયતા અથવા ગૌરવને આંચ આવે. જો કોઈ બહારની વ્યક્તિ આ નિયમોનું ઉલ્લંઘન કરશે તો તેની સામે લાગુ પડતા વિશેષ કાયદાકીય નિયમો અને ફોજદારી કાયદા અંતર્ગત શિક્ષાત્મક પગલાં ભરવામાં આવશે. શિક્ષણ વિભાગના આ કડક પગલાથી શાળાઓમાં રાજકીય ગતિવિધિઓ અને બિનજરૂરી લોકપ્રિયતા મેળવવાની પ્રવૃત્તિઓ પર કાયમી રોક લાગશે તેવી અપેક્ષા છે.
