ગોંડલ પંથકમાં કાયદો અને વ્યવસ્થાને પડકારતી એક ગંભીર ઘટના પ્રકાશમાં આવી છે, જેમાં એક પરિણીતાને તેના પતિના જામીન અને ગુનામાં નામ નહીં ખોલવાની ધાકધમકી આપીને તોડ પાણી કરવાનો મામલો સામે આવ્યો છે. પ્રાપ્ત વિગતો અનુસાર, ગોંડલના સ્થાનિક વિસ્તારમાં રહેતી એક પરિણીતાના પતિ ઉચાપતના ગંભીર ગુના હેઠળ સબ જેલમાં બંધ હતા. આ પરિસ્થિતિનો લાભ લઈને એક કથિત પત્રકાર અને તેની ગુનાહિત માનસિકતા ધરાવતી ટોળકીએ સક્રિય થઈને પરિણીતાનો સંપર્ક સાધ્યો હતો. આ ટોળકીએ પોલીસ, જેલ ખાતા તેમજ ન્યાયતંત્રમાં પોતાની ઊંડી વગ હોવાનો દંભી દાવો કર્યો હતો અને પરિણીતાને વિશ્વાસમાં લેવાનો પ્રયાસ કર્યો હતો.
આ ગુનાહિત ટોળકીએ પરિણીતાના પતિને જેલમાંથી સહેલાઈથી મુક્ત કરાવી આપવાની તેમજ આ સમગ્ર પ્રકરણમાં પરિણીતા અને તેના સસરાનું નામ કોઈ પણ સંજોગોમાં આગળ નહીં ખોલવાની ખાતરી આપી હતી. આ ખોટી બાંહેધરી આપીને કથિત પત્રકાર અને તેના સાગરિતોએ અલગ અલગ તબક્કે અનેક વખત કરીને કુલ છવીસ લાખ જેવી માતબર રકમ બળજબરીપૂર્વક પડાવી લીધી હતી. લાંબી રકમ ચૂકવ્યા બાદ પણ જ્યારે પરિણીતાના પતિના જામીન ન થયા ત્યારે ભોગ બનનાર પરિણીતાને છેતરાયા હોવાનો અહેસાસ થયો હતો. જ્યારે તેણીએ આ બાબતે પોતાના આપેલા નાણાં પરત માંગ્યા, ત્યારે આરોપીઓ દ્વારા ઉલટાનું પરિણીતાને ગંભીર પરિણામો ભોગવવાની ધમકીઓ આપવામાં આવી હતી.
આ સમગ્ર પ્રકરણથી ત્રસ્ત થઈને પરિણીતાએ હિમ્મત દાખવીને સ્થાનિક પોલીસ મથકમાં લેખિત ફરિયાદ નોંધાવી હતી. આ ગંભીર ફરિયાદના આધારે પોલીસ તંત્ર હરકતમાં આવ્યું હતું અને ગુનાની ગંભીરતાને ધ્યાનમાં રાખીને ત્વરિત તપાસ હાથ ધરવામાં આવી હતી. તપાસ કરનાર પોલીસ અધિકારી દ્વારા કથિત પત્રકાર રવિ રાજેશભાઈ રામાણી, અજયકુમાર સંજયગીરી ગોસ્વામી અને મયુરકુમાર લીલાધરભાઇ ફીચડીયા નામના ત્રણ શખ્સોની ધરપકડ કરવામાં આવી છે. પકડાયેલા તમામ આરોપીઓને પોલીસ દ્વારા કાયદેસરની કાર્યવાહી પૂર્ણ કરી અદાલતમાં રજૂ કરવામાં આવ્યા હતા, જ્યાં અદાલતે આરોપીઓના પાંચ દિવસના રિમાન્ડની માંગણી સામે એક દિવસના પોલીસ રિમાન્ડ મંજૂર કર્યા છે. આ મામલે પોલીસ દ્વારા વધુ ઊંડાણપૂર્વક તપાસ ચલાવવામાં આવી રહી છે જેથી આ રેકેટમાં અન્ય કોણ કોણ સામેલ છે તેની વિગતો બહાર આવી શકે.
