દક્ષિણ ગુજરાતના તાપી જિલ્લામાં વ્યારા સુગર મિલ દ્વારા શેરડીના બાકી નાણાંની ચૂકવણી ન કરવામાં આવતા અન્નદાતાઓમાં ભારે રોષ ભભૂકી ઊઠ્યો છે. ગત પિલાણ સીઝનમાં સુગર ફેક્ટરીમાં જમા કરાવેલી શેરડીના નાણાં લાંબો સમય વીતવા છતાં ખેડૂતોના બેંક ખાતામાં જમા થયા નથી. આ અન્યાય સામે પોતાના પરસેવાની કમાણી મેળવવા માટે સેંકડો ખેડૂતો એકત્ર થઈ રસ્તા પર ઉતરી આવ્યા હતા અને સુગર મિલ પ્રશાસન તેમજ સ્થાનિક વહીવટી તંત્ર સામે વિરોધનું બ્યુગલ ફૂંક્યું હતું.
ખેડૂતોએ પોતાના હકની માંગણી સાથે વ્યારાના મિશન નાકાથી જિલ્લા સેવા સદન સુધી એક વિશાળ ટ્રેક્ટર રેલીનું આયોજન કર્યું હતું. સુગર મિલ સંચાલકોની નીતિ સામે ખેડૂતોએ ઉગ્ર સૂત્રોચ્ચાર કરીને વાતાવરણ ગજવી મૂક્યું હતું. મોટી સંખ્યામાં ટ્રેક્ટરોના કાફલા સાથે નીકળેલી આ રેલી સેવા સદન પહોંચી હતી, જ્યાં ખેડૂતોએ હોબાળો મચાવી સેવા સદનનો ઘેરાવ કર્યો હતો. ખેડૂતોએ પોતાની ગંભીર આર્થિક પરિસ્થિતિ રજૂ કરીને સત્વરે નાણાં ચૂકવવાની પ્રબળ માંગણી કરી હતી.
આંદોલનકારી ખેડૂતોએ જણાવ્યું હતું કે અગાઉ સુગર મિલના મેનેજિંગ ડિરેક્ટર અને જિલ્લા કલેક્ટર સાથે યોજાયેલી બેઠકમાં પંદરમી તારીખ સુધીમાં તમામ બાકી રકમ ચૂકવી દેવાની ખાતરી આપવામાં આવી હતી. મિલ પ્રશાસન દ્વારા આ મામલે લેખિત બાંહેધરી પણ આપવામાં આવી હોવા છતાં નિર્ધારિત સમય વીતી ગયા પછી પણ ખેડૂતોના ખાતામાં એક પણ રૂપિયો જમા કરવામાં આવ્યો નથી. વારંવાર અપાતા પોકળ આશ્વાસનોથી ત્રસ્ત થઈને આખરે ધરતીપુત્રોએ આંદોલનનો આકરો માર્ગ સ્વીકારવો પડ્યો છે.
ખેડૂત આગેવાનોએ સ્પષ્ટ ચીમકી ઉચ્ચારી છે કે બિયારણ, ખાતર અને મજૂરીના ખર્ચ વચ્ચે સુગર મિલ દ્વારા ચૂકવણી અટકાવી રાખવામાં આવતા ખેડૂતો ભારે દેવા હેઠળ દબાઈ રહ્યા છે. જો આગામી દિવસોમાં તેમના મહેનતના બાકી નાણાંનું તુરંત નિરાકરણ નહીં આવે, તો સમગ્ર તાપી જિલ્લામાં આ લડત વધુ તેજ બનાવવામાં આવશે અને ઉગ્ર આંદોલન છેડવામાં આવશે, જેની સંપૂર્ણ જવાબદારી મિલ પ્રશાસન અને તંત્રની રહેશે.
