અમદાવાદ શહેરના ગીતા મંદિર બસ મથક નજીક ધમધમતા મોબાઈલ માર્કેટમાં ચાલતા એક વિશાળ નકલી મોબાઈલ ફોન કૌભાંડનો સ્થાનિક ગુના શાખા ઝોન-૬ દ્વારા પર્દાફાશ કરવામાં આવ્યો છે. ચોક્કસ બાતમીના આધારે હાથ ધરાયેલી આ કાર્યવાહીમાં પાંચ જેટલી મોબાઈલની દુકાનો અને ગોડાઉનો પર ઓચિંતો છાપો મારવામાં આવ્યો હતો. આ દરોડા દરમિયાન સેમસંગ, નોકિયા અને જીઓ જેવી પ્રતિષ્ઠિત બ્રાન્ડના ૧,૦૩૪ જેટલા ડુપ્લિકેટ કીપેડ મોબાઈલ ફોન મળી આવ્યા હતા. પોલીસે આ કાર્યવાહીમાં રૂપિયા ૭ લાખથી વધુની કિંમતનો મુદ્દામાલ જપ્ત કરીને કાયદેસરના પગલાં ભર્યા છે.
પોલીસ તપાસમાં બહાર આવ્યું છે કે આ સમગ્ર રેકેટ નકલી સ્પેરપાર્ટ્સ ભેગા કરી ફોન બનાવીને બજારમાં સસ્તા ભાવે વેચવાનું કામ કરતું હતું. આ મામલે રમેશ સોલંકી, જીતેન્દ્ર પ્રજાપતિ, રવીન્દ્રકુમાર છીપા, રૂપારામ ચૌધરી, દિનેશકુમાર ઘાંચી અને મહેન્દ્ર મોદી નામના શખ્સોની ધરપકડ કરવામાં આવી છે અને તેમની સામે ટ્રેડ માર્ક્સ એક્ટ હેઠળ ગુનો દાખલ કરવામાં આવ્યો છે. તપાસ દરમિયાન એક સ્થળેથી જીઓ બ્રાન્ડના મોબાઈલનું એસેમ્બલિંગ યુનિટ પણ મળી આવ્યું હતું. આ ઉપરાંત કોઈપણ પ્રકારના બિલ વગરના ચાર્જર, બેટરી અને બોગસ સ્ટીકરોનો મોટો જથ્થો પણ જપ્ત કરાયો છે.
પોલીસ અધિકારીના જણાવ્યા અનુસાર, આરોપીઓ એક જ આઈએમઈઆઈ નંબરના સ્ટીકરો ૫૦ થી ૬૦ મોબાઈલ ફોન પર લગાવતા હતા. મોબાઈલની અંદર દર્શાવેલો નંબર અને બહારના સ્ટીકરનો નંબર તદ્દન અલગ હતો. કંપનીના અધિકૃત પ્રતિનિધિઓએ સ્થળ પર આવીને તપાસ કરતાં તમામ જપ્ત ફોન અને એસેસરીઝ નકલી હોવાની પુષ્ટિ થઈ હતી. કેટલીક કંપનીઓએ વર્ષ ૨૦૨૪માં ઉત્પાદન બંધ કરી દીધું હોવા છતાં તે મોડેલ નવા તરીકે વેચવામાં આવી રહ્યા હતા. હાલ પોલીસ આ બોગસ મોબાઈલ ફોનનો ઉપયોગ સાયબર ફ્રોડ કે અન્ય રાષ્ટ્રવિરોધી ગેરકાયદે પ્રવૃત્તિઓમાં થયો છે કે કેમ તે દિશામાં પણ ઊંડાણપૂર્વક તપાસ ચલાવી રહી છે.
